Charter Document - 03900061

Ich Alber vnd ich Vlreich vnd ich Wernhart prueder genennet die Strewnen von swarcznaw verichen an disen prief daz vnser mueter vrow Agnes mit aller vnser erben vnd mit vnserm gueten willen hat gegeben swas sie aigens hat gehabt dacz dem Nidern holabrun ze veld oder ze dorf Nyclan dem Esel zechauffen daz des alten hern Sygloches svn vm ir habent gehabet oder swer iz von ir hat daz iz der von im emphohen sol ob er im sein gan vmb zehen phvnt wienner phenning vnd schul wir des scherm sein als landes recht ist als man aygen schermen sol Des geh wir im dem vorgenanten Nycla dem Esel disen prief ze einem vrchund Der prief ist geschriben do von Christes gepurte war Tausent iar vnd zwaihvndert iar vnd acht vnd newnczig iar vnd sint des gezeug die hie geschriben sint her Vlreich von Wolfgerstorf her Dietreich sein prueder her erchenberecht von goos her Vlreich von Pylechdorf Ott vnd Hadmar vnd weichard vnd Alber die prueder von Ottenstain wilhalm von Paumgarten vnd Chadolt sein prueder vnd ander genuech die auch triwen wirdich sint