Charter Document - 03900054

Universis sancte matris ecclesie fidelibus ad quos presentes littere pervenerint Nos dei gratia petrus Arborensis Rogerus sancte Severine Archiepiscopi franciscus terracensis Romanus Covensis perronus larinensis Ainnardus lucerie Maurus Amiliensis andreas liddensis Sabbas militensis Jacobus treventinus Ciprianus bonensis et Stephanus Opidensis Episcopi Salutem in domino sempiternam Licet is de cuius munere venit vt sibi a suis fidelibus digne ac laudabiliter serviatur de habundantia pietatis sue merita supplicum excedens et vota bene servientibus multo maiora tribuat quam valeant promereri Desiderantes tamen reddere domino populum acceptabilem fideles christi ad complacendum ei quasi quibusdam allectivis muneribus indulgentiis videlicet et remissionibus minutarum vt exinde reddantur gratie aptiores Cupientes igitur vt ecclesia in Neunburga pataviensis diocesis vbi congregatio dominarum deo devotarum existit que ad honorem sive laudem beati Jacobi Apostoli est fundata sive de novo fundanda congruis honoribus frequentetur et a cunctis Christi fidelibus jugiter veneretur omnibus vere penitentibus et confessis qui causa devotionis in festivitatibus subscriptis videlicet Nativitatis domini parasceves resurrectionis domini nostri Jesu Christi tempore rogationum Ascensionis pentecostes et in omnibus diebus dominicis et in omnibus festis beate Virginis Marie et in festo beati Michaelis archangeli et beatorum Johannis baptiste et evangeliste et in festis omnium apostolorum beatorum Nicholai laurentii et Martini beatarum Marie Magdalene Margarete et Cecilie et in festo omnium sanctorum et in omnibus dedicationibus prefate ecclesie et per octavas predictarum festivitatum Octavas habentium ad prefatam ecclesiam accesserint et ibidem divinum officium seu predicationem dei matris ejus ac aliorum sanctorum in festivitatibus suprascriptis devote audierint vel qui prenotate ecclesie fabrice reparationibus substentationibus luminariis libris vestimentis calicibus campanis altarium ornamentis seu aliis necessariis manus porrexerint adjutrices vel quicquam facultatum suarum in extremis eidem ecclesie legaverint donaverint miserint per se vel per alios eidem quocumque modo licito procuraverint sive quocumque tempore anni aliquales oblationes eidem ecclesie prelibate Karitative contulerint Nos de omnipotentis dei misericordia gloriose semper virginis Marie beatorum petri et pauli apostolorum eius auctoritate confisi singuli XL dies de iniunctis sibi penitentiis dummodo ad id diocesanus consenserit misericorditer in domino relaxamus In cuius rei testimonium presenti scripto Sigilla nostra apposuimus Datum Rome Anno domini millesimo ducentesimo nonagesimo quinto pontificatus domini bonifacii pape octavi anno primo