Charter Document - 03890063

Ich Ulreich von Ternberch vergich vnd tvn chvnt allen gveten levten an disem brief daz ich mit meines herren des erbern brobst Wolfgers vnd aller seiner Samnvng gveten willen ir goteshavses aigens von Hertzogenbvrch datz Hainreiches chinden von Etzleinsperg zwen achher in Etzleinsperger vang der ainer der Ger vnd ainer der Cholrer von alter gewonhait sint genant mir vnd meinem erben ze rechtem purchrecht han gechauffet also daz ich oder mein erben swer di achher hat alli iar an sant Cholmans tag dem vorgenanten Gotshaws hintz Herczogenburch von dem Gern achzehen pfennig vnd von dem Cholrer zwelf pfennig der gewohnlichen wiener Mvntz dev dann gebich ist an alle Savmvng ze purchrecht dienen sol als ain ander lant man Ist aber daz ich oder mein erben an dem vorbenanten tag dem gotshavs den benanten dinst nicht dienent so sol mir vnd avch meinen erben wandel vnd pvezz dar avf gen als ainem ainvaltigen lant man avf sein purchrecht get nach des landes recht Daz dev red meinen herren von Herczogenbvrch mir vnd meinen erben vnverchert beleib vnd also stet sei gib ich in disen brief versigelten vnd bestetten mit meins herren des ersamen brobst vlreichs Insigel von Sant Andre vnd avch mit dem mein selbes Insigel Des sint gezeug Her Chvnrat der Arnstainer her Fridreich der Retlenperger Seifrit der Lochler Elwein von Graben Herwort von Wielanstal Wolfhart von Etzleinsperge Havchh vnd Albero von Gotzinsdorf vnd ander vrvm levt Das ist geschehen nach Christes gebvrt Tavsent lar zway hundert lar in dem sechs vnd Nevntzkisten lar Datz Herczogenburch an sant Nycklas tag