Charter Document - 03890061

Ich Wolfhart von Dvrrenpach tuen chvnt allen gveten leuten an disem brief daz ich mit gvetleichem willen meiner chind vnd aller meiner erben dem gotshavs des gveten sant Jorgen datz Hertzogenburch pei meins herren brobst Wolfkers zeiten gegebn han ein phunt geltes vnd siben phennig meins vrein aigens datz Espeinsdorf avf einem lechn vnd avf einer hofstat alli iar an sant Mychelstag Daz sev mir mein herre der brobst Wolfker mit aller der Samenung ze wider wechsel habent gegeben ein phunt geltes datz Durrenpach zenast an meinem hof obn an dem ort avf einem lechen auch an sant Mychelstag ze dienen mir vnd allen meinen erben Ich soll avch dem gotshavs daz gvet schermen nach des landes recht swa im des datz mier oder datz meinen erben abgieng do hab daz gotshaus auf dem aigen daz iz mir gegeben hat Daz dev red also stet beleib gib ich meinem herren dem brobst vnd auch der Samenvng disen brief versigelten mit meins herren hern Stephans Insigel des Meyssawer Des sint avch gezeug Mein herre her Fridreich der Chamerer her Chvnrat der Svmerawer her Chunrat der Arnsteyner Fridreich der Retelnperger Sifrit Lochler Herbart von wielantstal vnd ander vrum leut Daz ist ergangen nach Christes gebvrt Tausent iar zway hundert iar in dem vier vnd Nevntzkisten iar Datz Hertzzogenburch an sant Nyclabes tag