Charter Document - 03890059

Ich Irnfrit S Hern Gozzen Sun von Chrems tun allen leuten chunt daz ich durch meines Herren bet brobst wolfkers von Herzogenburch vnd seiner samenunge mich des erchant han vm den Cechnt datz Tymendorf des ich von im vnd von seinem Gotshavs ze purchrecht iach ze dreyzk pheningn dinsts an Sant Mychelstag daz ich daran mit recht nicht macht gehaben vnd han den chriech willichleichen lazzen daz ich an dem selben Cechnt purchrechts nicht engich vnd durch di vueg daz ich in vnd sein samenunge han aribeit vber haben di si gegen mir mit teiding vnd mit chlag trachten vm den selben Cechntn hat mein her brobst wolfker vnd alle sein samenunge mir vnd mein zwayn Sunen Christann vnd Gozzen den selben Cechntn gegeben alein zu vnsern tagn well aver wir in verchavffen so schull wir sev in anvailn vnd schvln si vrevntlich an dem chavff handeln Wervent aver si sein nicht so schaff vnsern vrvmen damit als wir mvgen Daz dev red also stet beleib gib ich meinem herren brobst wolfkern von Hertzogenburch vnd seiner Samenunge disen brief vnder der stat Insigel vnd mit dem meinem Des sint gezeugen Rapot der Richter Rudiger Eben sun Walchun Iacob von Steyn Der zechtner Eberhart Her Leupolt vnd Seybot Her Hyltperg Andre vnd Cholmann vnd ander vrvm levt Daz ist geschechen nach Christes gebvrt Tavsent vnd zway hundert iar in dem Drev vnd Nevntzkisten iar Datz Chrems an Sant Lavrencen tag