Charter Document - 03890058
| Charter Number: | 03890058 |
|---|---|
| Cartulary Title: | Herzogenburg, Stift |
| Charter Language: | German |
| Charter Origin: | Lay |
| Charter Type(s): | Grant |
| Date: | 1292 |
| Date type: | Internal, A.D., Feast |
| Resource Link(s): |
Monasterium.net |
Charter:
Wier Otto vnd Margret zway chonleut geheizzen von dem Steyn veriehen an diesem brief daz wir dem gueten Sant Jorgen vnd dem havs datz Herzzogenburch haben gegeben durch gotes lieb vnd vnserre Sel ge hugenusse ein hofstat eines halben Lechns ze rechtem aigen di Albrecht der Mvlner e moln von vns hat gehabt ze rechtm purchrecht vnd ist daz geschechen mit vnserre chind Suen vnd Tochter vnd aller vnserre erben gvetlichem willen zv so getanem recht daz der vorgenant Albrecht oder seinev chint oder swer di hofstat hab dem selben gotshavs alli iar an Sant Michelstag di selben hofstat verpurchrecht mit zwayn phenningen der gewonlichen wienner mvnizz Daz dev redh stet vnd vnverchert beleib dar vber geb wir disen brief versigelten mit vnserm insigel mit disen gezeugen Her Chunrat von Schevrnberch Her Ludweich von dem Steyn Her Otto Schevrberh Her Otto vnd Her Hainrich Zinzendorfer von Herzzogenburch Eberhart der Richter Chunrat Ruemer Hainreich Zechtner vnd ander vrvme levt Daz ist geschechen nach Christes gebvrt Tavsent vnd zway hvndert in dem zway vnd nevnzzkisten Jar an dem Mathiastag