Charter Document - 03890013

Clemens episcopus seruus seruorum dei Dilectis filiis R Abbati de Cuuetel et H Preposito sancti Ipoliti salutem et apostolicam benedictionem Conquestio dilectorum filiorum nostrorum Prepositi sancti Georgii et fratrum nobis proposita patefecit quod cum olim questione inter eos et R patauiensem canonicum fuit super quibusdam decimis et iure parrochiali mota et diutius uentilata litere commissionis a felicis recordationis Lucio papa predecessore nostro ad H sancte Crucis et R Cotowicensem Abbates O Patauiensem et G Niwenburgensem Prepositos processerunt qui ius utriusque partis discussione legitima perquirentes post plenariam cognitionem sententiam canonice pro eodem Monasterio protulerunt Verum postquam venerabili fratri nostro Salzburgensi Archiepiscopo de tali sententia innotuit monasterium ipsum super quo miramur a diuinis officiis suspendit et sententiam excommunicationis nichilominus in fratres protulit pro sue arbitrio uoluntatis contra debitum episcopalis auctoritatis improba instantia cogens eos iuri suo cedere et abrenuntiare his que sibi per legitimam sententiam adiudicata noscuntur Quoniam igitur tantum conquerentium grauamen nolumas sicut nec debemus sub dissimulatione transire eidem Archiepiscopo dedimus in mandatis ut utramque sententiam in prefatos conquerentes latam non differat sicut iustum fuerit relaxare nec eos in aliquo molestet indebite quousque suus episcopus a Jerosolimitano itinere reuertatur cum tempore arrepti itineris omnia sua debeant sedis apostolice protectione gaudere Ideoque discretioni uestre per apostolica scripta mandamus quatinus memoratum Archiepiscopum ad hoc moneatis et attentius inducatis Quod si monitis uestris acquiescere forte noluerit uos nostra freti auctoritate utramquo sententiam sicut iustum fuerit sublato appellationis obstaculo relaxetis Datum Laterani XV Kal Martii Pontificatus nostri Anno Tertio