Charter Document - 03880347
| Charter Number: | 03880347 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | German |
| Charter Origin: | Lay |
| Charter Type(s): | Confirmation |
| Date: | 1298 |
| Date type: | Internal, A.D., Feast |
| Resource Link(s): |
Monasterium.net |
Charter:
Ich Alber von Polnhoim vergich vnd tvn chunt an diesem brief allen lvwten die nu lebent vnd hernach chumftich sint daz mir min oehaim her Reimpreht von Ebersdorf zder zeit vnd ers wol getvon moht schuf sins freien aigens ze Gewreichstenn zwelf Schilling geltes ovf seinem Lehen Derselben zwelf Schilling han ich ein pfunt gegeben dem Conuent daz dem hailigen chrevtz ewichlich durch miner hovsfrowen sel vern Dietmuten vnd vber daz selb pfund setz ich mich selben ze gweren vnd ze scherm nach Landes reht Daz ander halb pfunt geltes verchovf ich dem vorgenanten Conuent vmb vier pfunt pfenning vnd bin der gewert vnd setz in darvber ze scherm vnd ze Ebentewr dev vier vvder hews ze Lachsendorf die si mir gebeut alle iar Dar vber gib ich dem abt vnd dem Conuent disen brief mit minem Insigel versigelt Ditz ist geschehen an sant Cholmans tach nach Christes geburd vber towsent zwai hundert vnd aht vnd Newntzich Jar