Charter Document - 03880346

Universis Christi fidelibus presentes litteras inspecturis nos Philippus Salernitanus et frater Basilius Jerosolimitanus dei gracia archiepiscopi Adam Marturanus Ciprianus Bouensis Ventura Eugubinus Matheus Veglensis frater Romanus Croensis Leonardus Ansanus Andreas Venafranus frater Stephanus Balneoregensis frater Lambertus Aquinatensis Landonus Suanensis et Ildebrandus Aretinus eadem gracia episcopi salutem in domino Sanctorum meritis inclita gaudia fideles Christi assequi minime dubitamus qui eorum patrocinia per condigne deuotionis obsequia promerentur illum quoque uenerantur in ipsis quorum gloria ipse est et retributio premiorum Nos igitur ad consequenda predicta gaudia causam dare fidelibus cupientes omnibus uere penitentibus et confessis qui ad ecclesiam sancti Nicolai de sancta cruce Patauiensis diocesis in festo natiuitatis resurectionis et ascensionis domini et Pentecosten in singulis festiuitatibus beate Marie virginis in festo sancti Nicolai in festo beatorum Petri et Pauli et omnium aliorum apostolorum in festo omnium sanctorum et in dedicatione ipsius ecclesie cum deuotione et reuerentia accesserint annuatim et manum porrexerint adiutricem uel quomodo libet de bonis ipsorum pro reparatione fabrica luminariis et aliis dicte ecclesie ornamentis dederint uel miserint seu in extremis legauerint de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies de iniuncta eis penitentia misericorditer in domino relassamus dummodo ad id diocesani uoluntas accesserit et consensus Datum Rome apud sanctum Petrum anno domini Millesimo ducentesimo nonagesimo octauo mense Martii pontificatus domini Bonifatii pape octaui anno quarto