Charter Document - 03880337

Wir Haug vnd Hainrich bruder genant die Thursen von Liechtenuels veriehen allen den di diesen brief ansehent oder hoerent lesen daz der gewerft der zwischen dem erbern manne abt Bertolde von dem heiligen crvece en seite vnd Murreln hern Chunrads diener von Potendorf ander Seite geschehen ist vmb ein weide die derselbe Mvorrel da zu dem Chaltengange bei Drumawe hat mit vnser gunst vnd mit vnserm gueten willen geschehen vnd ergangen ist vnd wand diu eigenschaft desselben gutes vnd swaz der uorgenante Mvorrel anders da hat vnser was daz er uon uns zu lehen hette so hab wir dem abt und der samnunge von dem heiligen crvece diu eigenschaft der weide vnd alles des daz er da von uns zu lehen hat gehabt lediclich aufgegeben vnd haben daz gelobt zu schermen als landes recht ist Vnd zu widerwehsel haben wir genomen von dem abte vnd dem conuent ein halbez lehen da zu Wartperge bei Egenburch daz alle iar dienit ein halb phunt vnd zehin phening wienner daz sol vns auch der abt vnd die samnunge von dem heiligen crvece schermin als lands recht uordirt Disen brief han ich Haug mit meinem ingesigel von vnser beder weg versigelt wand mein bruder nicht ingesigels hette vnd des Wechsels der recht vnd redlich zwischen uns geschehen ist sint geziuch her Chunrad her Sybot vnd her Hainrich drei brueder genant von Potendorf vnd zu uorderst abt Eber uon Zwetel vnd Otte von Rauhenek vnd Roinprecht vnsere vettern her Otte von Wildek her Marquard des Chunringer ritter vnd manig ander frum man Dirr brief ist gegeben da zu Wienn da dirr Wechsel geschach an sand Mathies tag du von Christes geburt ergangen waren thausent vnd zwei hundert vnd vunf vnd niunzich iar