Charter Document - 03880328

Wir Abt Perhtold vnd dev Samnung von dem hailigen Chrevtz grabes Ordens tven ze wizzen an diesem brief allen leuten die in nv lesent oder noch lesent werdent daz wier mit gvetleichem willen vnd gemainem rat vnser aigen daz wier an Holtz vnd an waid haben pei Govnesdorf vnd bei Bobstorf hingegeben vnd verchouft ze rehtem bvrchreht haben den Burgern von Govnesdorf des Herzogen Leuten vnd ouch vnsern Leuten von Bobstorf also daz an alle widerred die selben Burger von Govnesdorf vns davon ierleich aht phvnt wienner phenning dienen schvllen vier phvnt ze weihnahten vnd vier phvnt ze sand Gorgen messe vnd ouch vnser Leut von Bobstorf siben phvnt der selben mvnz dienen schvln vier phvnt ze weihnahten vnd drev ze sand Gorgen messe Daz selbe pvrchreht hab ouch wier in ovzbeschaiden an tailen vnd an gemerchen als hie geschrieben stet Des ersten ist gevallen ze tail des Herzogen Leuten von Govnesdorf ein holtz haizzet dev Eben vnd aver ein holtz haizzet daz Haslach vnd aver ein holtz haizzet Radmarschogel daz get vntz an daz holtz das da haizzet der Ger vnd an daz Hasla vnd daz Hengestal daz in die eben gehoert Darnah ist gevallen ze tail vnsern Leuten von Bobstorf ein waid haizzet dev Haid darinne leit ein acher der angehoert des Schellen erben der e amtman was der vns dient zwaintzich phenning vnd darzve ist in gevallen ein holtz haizzet di Hanifleit vnd ein tail haizzet der Ger von dem Radmarschogel Daz tail get von der Pobstorfer echern vntz an der Schricher wech Daz dieser gewerft zwischen vns vnd in stet beleib vnd vnverwandelt des geb wir in disen brief versigelten mit vnserm insigel vnd setzen daran die nam der Gezevg mit derer gewizzen iz geschehen ist Des ersten Maister Gotfrid des Herzogen obrister Schreiber Herr Herman von Landenwerch der obrist Marschalh Herr Vlreich von Chlingenwerch Herr Alber von Pollendorf der Zolr von Radavn her Chvenrat der hvebmaister Her Greiff ouf der Stetten alle dienstman vnd Ritter des Herzogen vnd des Landes vnd ander vrumer Leut genvech Daz ist geschehen vor vnserm heren dem Herzogen Albreht von ovsterreich und von Steyr nah vnsers heren gebverd tovsent Jar zwai hundert iar an dem vierden vnd Neuntzegistem iar