Charter Document - 03880307

Wier Chunrat an dem Harmarkcht der Richter Chvoenrat der Polle der Purgermaister vnd der gemainrat von der Stat ze Wienne veriehen vnd tvoen kvnt allen die disen brief gesehent oder gehoerent daz die erbern leut weilen Her Ernst vnser burger vnd ver Gerdroevt sein hovsvrowe da si baide lebten vnd wol mahten einen hof datze Swechent mit gemainem rate und gvoetleichen willen schvoeften den vrowen datze sant Nycla und ierem Conuent ewichleich nah ier baider tot durch ier sele willen Da si dv baide tot gelagen der vorgenant Ernst vnd ver Gerdrovt sein housvrowe da choemen vvr vns ier baider svne der Jacob vnd der Hainreich vnd ier aidem der Hainreich vnd der Walther vnd bestetigen daz geschefte vmb den vorgenanten hof vor vns vvr sich vnd vvr alle ier geerben also daz der hof mit allem dem daz darzvoe gehoert den vorgenanten vrowen ewichleichen dienen schol Darvmbe ze einen vorchvnde des geschefftes und der stetigunge des vorgenanten hoves geh wier disen brief mit vnserr stat insigel Des sint gezevg Her Reinbot der Zeleub der hvoebmaister her Greiff ouf der Stetten her Vlrich der Rvkchendorfer her Jacob von Hoyen der Lantschreiber her Pilgreim der Chrigler her volman an dem Witmarcht her Paltram der Vatz her volreich vnder der Louben her Hainreich der Hansgraf her Hainreich der Smit vnd ander leut ein michel tail Daz ist geschehen nah vnsers herren gebvoerd tousent iar vnd zwai hvndert iar vnd neun vnd ahtzich iar