Charter Document - 03880299

Notum sit omnibus tam presentibus quam futuris quod ego Margareta de Rauhenekk relicta domini Ottonis Tursonis de consensu et voluntate filii mei Ottonis vniuersa et singula que pie recordacionis dominus Otto Turso maritus meus apud Chaltengang iure proprietario dum viveret possidebat mihique nomine dotalicii libere possidenda reliquit post excessum meum de hac mortali vita ad liberos nostros Ottonem et Agnetem hereditarie transitura domino Sighardo venerabili abbati et conuentui sancte crucis vendicione publica venumdedi pro XXVI talentis denariorum wiennensium sibi suoque monasterio iusto proprietatis titulo perpetuo permansura exceptis solummodo fenetis ab antiquo ad castrum pertinentibus que propter euidentiam clariorem hic curauimus adnotari videlicet vronwis eisnorinne et pratum quod dicitur Vierluzzen hec tantum michi meisque predictis liberis remanebunt Cum igitur ad presens consensum filie mee Agnetis vxoris domini Chadoldi de Haslaw non habuerim promisi et promitto assensum ipsius quantocius obtinere Quod si facere nequiero uel neglexero placuit de consensu sepe dicti filii mei Ottonis pro equipolencia que vulgo ebntewer dicitur redditus X solidorum in Gundramsdorf super mansos Weichardi et Aespini et Gundoldi sitos qui ad me specialiter paterna hereditate pertinent predictis abbati et conuentui assignare Quia vero iam dicti redditus valoris congrui minus habent dominus Vlricus de Ror dilectus genitor meus ac fratres mei Wolfgerus Otto Dietmarus nec non filius meus Otto promittunt et promiserunt presencium veritate defectum eiusmodi de rebus propriis adimplere et ab impeticione filie mee Agnetis ac omnium contradicentium seu quomodo libet inpedire volencium predictos abbatem et conuentum indempnes et quietos per omnia conseruare Adicitur etiam quod si filia mea Agnes consensum premissis omnibus dare nollet ex tunc filius meus Otto de porcione hereditatis ipsum contingente plenam eidem faciet recompensam ita quod in sua empcione sepe memorati abbas et conuentus tranquilli sint omnimodis et securi Ne igitur premissa omnia et singula a quoquam irritari valeant uel turbari presentem litteram conscribi et sigillis nobilium virorum domini Ottonis de Haslaw et domini Vlrici de Ror genitoris mei nec non Ottonis filii mei dicti Tursonis procuraui muniri nominaque testium subnotari qui sunt dominus Otto de Haslaw senior dominus Otto de Rotenstain filius eius dominus Albertus Stuhso dominus Hermannus de Wolfgersdorf dominus Vlricus de Roer Wolfgerus Otto Dietmarus filii eius Leutoldus dictus Chreuzpech Otto de Paden Fridericus de Mitterndorf Haidenricus et Fridericus de Veikersdorf Albertus Veuslo Chunradus et Heinricus de Tohnstein et alii quam plures Actum et datum in Paden anno domini MCCLXXXVI in die sancti Galli confessoris