Charter Document - 03880294

Wernhardus dei gracia ecclesie Pattauiensis episcopus vniuersis ad quos tenor presentis scripti peruenerit salutem in domino Jesu Christo Piis predecessorum nostrorum exemplis inherere volentes qui se religiosis viris in largiendis elemosinis et in conferendis beneficiis exhibuerunt liberales dilectis in christo fratribus abbati et conuentui sancte crucis Cysterciensis ordinis nostre dyocesis libertatem illam et graciam quam a nostris habuerunt predecessoribus innouamus et concedimus de liberalitate nostra ac fauore quo ipsos prosequimur et precipue ob diuinam remuneracionem que nos super nostra merita suis largifluis beneficiis honorare curauit vt videlicet in locis omnibus ecclesie nostre Patauiensis tam apud Danubium quam apud Enum sales quos annuatim recipiunt de elemosina ecclesie Salzburgensis videlicet duo talenta maioris ligaminis quod Schefpant dicitur transducant libere sine muta ita vt nec a iudicibus nostris sev officialibus ac mutarum nostrarum et theloneorum prouisoribus nomine mute sev thelonei vel cuiuscumque alterius exactionis nichil ab eis penitus exigatur in sortem pensionis nobis debite quidquid de dictis salibus soluere deberent a mutariis nostris et officialibus conputandum Volumus etiam vt si quis de partibus Austrie vel de vectoribus salium eorundem cuiquam de nostris debitor existat racione quacumque propter hec dictus abbas et conuentus sancte crucis non inpedietur vllatenus vel grauetur sed sales eorum proprii abire libere permittantur Et vt hec nostre donacionis gracia iuxta antiqua ipsius monasterii priuilegia sigillo capituli nostri munita ab omnibus nostris officialibus prouide conseruetur ipsam presentibus litteris et sigilli nostri munimine roboramus Datum Vienne anno domini MCCLXXXVl decimo septimo calendas Maii