Charter Document - 03880290
| Charter Number: | 03880290 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Royal |
| Charter Type(s): | Grant |
| Date: | 1285 |
| Date type: | Internal, A.D., Calendar |
| Resource Link(s): |
Monasterium.net |
Charter:
Ladyzlaus dei gracia Vngarie Dalmacie Croacie Rame Seruie Gallicie Lodomerie Comanie Bvlgarieque rex omnibus christi fidelibus presentem paginam inspecturis salutem in omnium saluatore Quoniam generacio preterit et generacio aduenit propter obliuionis et diuersarum calumpniarum morbum necesse est facta principum scriptis et testibus roborari Cum igitur secundum apostolum omnes nos stare oporteat ante tribunal christi recepturi prout gessimus in corpore siue bonum fuerit siue malum ad noticiam vniuersorum tenore presencium volumus peruenire quod nos peccata nostra elemosinis redimere cupientes villam nostram Pardam id est Brodeynstorph dictam circa aquam Lytam in metis et terminis Austrie sitam cum omnibus prouentibus et possessionibus ad eandem villam pertinentibus scilicet vineis agris pratis pascuis siluis aquis insulis molendinis piscaturis venacionibus et aliis vtilitatibus suis vniuersis cultis et incultis ob honorem et reuerenciam gloriose et viuifice sancte crucis nec non pro salute et remedio anime nostre omniumque progenitorum nostrorum fratribus ecclesie sancte crucis ordinis Cysterciensis Patauiensis dyocesis libere et absolute dedimus et donauimus et contulimus perpetuo et inreuocabiliter possidendam ita quod ipsi fratres cum omnibus terminis et possessionibus cunctisque prouentibus ad ipsam villam pertinentibus pro ipsorum voluntate et arbitrio ordinent et faciant prout ipsis videbitur expedire Ut autem hec nostra donacio predicte ecclesie sancte crucis facta robur optineat perpetue firmitatis nec processu temporum per quempiam valeat seu possit retractari presentes concessimus litteras duplicis sigilli nostri munimine roboratas Datum per manus venerabilis patris Th episcopi Vachiensis aule nostre cancellarii dilecti fidelis nostri anno domini MCC octogesimo quinto indictione XIII nono kalendas Januarii