Charter Document - 03880289
| Charter Number: | 03880289 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1285 |
| Date type: | Internal, A.D., Calendar |
| Resource Link(s): |
Monasterium.net |
Charter:
Nos Wernhardus dei gracia ecclesie Pattauiensis episcopus profitemur et tenore presencium constare volumus vniuersis quod ad instanciam dilecti in christo fratris S venerabilis abbatis tociusque conuentus monasteri sancte crucis Cysterciensis ordinis et nostre diocesis ex necessitate non modica procedentem pia beneuolencia inclinati concessimus et dedimus auctoritate ordinaria consensu et voluntate plebani loci Alberti dicti de sancta Petronella accedente fauentibus etiam domino Al de sancta Petronella et Petro ac Hugone fratribus suis patronis ecclesie illius aream in cemiterio ecclesie in Gundramstorf dicto abbati et monasterio sancte crucis in qua de permissione Hertnidi dicti de Lihtenstein granarium siue promptuarium construxerant pro rerum suarum conseruatione quas ibi reponere bellorum tempore consueuerunt ad tenendum habendum et pro suis vtilitatibus perpetuo possidendum Liceat etiam eisdem fratribus siue monasterio in eadem area construere edificia suis necessitatibus oportuna Aream insuper adiacentem siue locum in parte anteriori promptuarii siue granarii supradicti ipsis donando et concedendo taliter addimus vt nullus in eodem loco ad incommoditatem et displicenciam dictorum fratrum erigere edificium aliquod audeat vel locare Et vt nostra in hac parte donacio et liberalitatis concessio perpetua firmitate subsistat presentes has litteras super eo dedimus nostro sigillo munitas Datum Wienne anno domini MCCLXXX quinto III nonas Decembris