Charter Document - 03880274

Acta hominum que post occasum presencium transire debent ad noticiam futurorum quasi fundamento stabili conuenit scripturarum testimonio roborari Nos igitur frater volricus diuina miseracione abbas de cella sancte Marie totusque conuentus eiusdem loci vniuersis christi fidelibus tenorem presericium inspecturis volumus fieri manifestum quod cum decimarum exactio statuta olim per vniuersum clerum a sede apostolica nos angariaret fortiter et vrgeret conpulsi sumus ob easdem decimas tribuendas quamdam partem possessionum nostrarum venumdare corde molesto et quoniam aliud facere non potuimus in rebus ecclesie nostre nos quamuis inuitos oportuit minorari Ex consensu igitur omnium nostrum et uoluntate communi multoque consilio prehabito et firmato de bonis ecclesie nostre septem talentorum et triginta denariorum redditus quorum VII talenta in villa que dicitur Toubezz et quinque solidos in velben locati sunt cum septem pullis pro weiseod domino Heinrico abbati et conuentui monasterii sancte crucis vendidimus pro sexaginta sex talentis et dimidio talento in eternum libere possidendos omni eo iure quo nos semper eos in pace possedimus et quo nobis collati et donati fuerant a memorabili duce Austrie Friderico Coloni vero predictorum reddituum in Toubezz et in Velben administracionem illam que vulgo Nahtseid dicitur et alia queuis seruitutis ofiicia sicut nobis exhibere consueuerant sic et memoratis domino abbati et fratribus atque nunciis domus sancte crucis quociens necesse est tenentur fideliter exhibere Porro si quisquam nobilium uel potencium ius aduocacie super eisdem redditibus quod ad solum principem terre pertinere dinoscitur sibi vsurpauerit uel quolibet modo adtraxerit nos et perpetui successores nostri tenebimur eundem coram principe terre contradiccione vera et intrepida propulsare ab vsurpacione ista friuola et iniusta Sciendum quoque est quod quilibet colonus mansum suum vendens sexaginta denarios pro debito quod dicitur ablait emens vero triginta denarios pro debito quod dicitur anlait dare tenetur sicut ab antiqua consuetudine est seruatum Ne igitur in hac vendicione nostra peracta solempniter domus et conuentus sancte crucis debeat vmquam aut valeat in posterum a nostris successoribus aliquam pati cuiuslibet impeticionis seu contrarietatis iniuriam vel quomodo libet perturbari presentis scripti patrocinio et certo fratrum nostrorum aliorumque proborum virorum testimonio cum appensione sigillorum nostrorum eandem in perpetuum confirmamus Testes autem sunt Gebhardus prior Heinricus capellanus domini abbatis Ebergerus cellerarius Vlricus infirmarius Heinricus plebanus de Neztah Dietricus Fridericus Sifridus sacerdotes et monachi celle sancte Marie Heinricus notarius Lienhardus procurator domini abbatis et filius eius Lienhardus Dietmarus et alii quam plures viri ydonei et fide digni Actum et datum anno domini MCCLXXXIII in die sancti Brictii in monasterio sancte crucis