Charter Document - 03880270

Gotfridus dei gracia ecclesie Patauiensis episcopus vniuersis ad quos tenor presentis scripti peruenerit salutem in domino Jesu Christo Piis predecessorum nostrorum exemplis inherere volentes qui se religiosis viris in largiendis elemosinis et in conferendis beneficiis exhibuerunt liberales dilectis in christo fratribus abbati et conuentui sancte crucis Cysterciensis ordinis nostre dyocesis libertatem illam et graciam quam a nostris habuerunt predecessoribus innouamus et concedimus de liberalitate nostra et fauore quo ipsos prosequimur et precipue ob diuinam reuerentiam que nos super nostra merita suis largifluis beneficiis honorare curauit vt uidelicet in locis omnibus ecclesie nostre patauiensis tam apud Danubium quam apud Enum sales quos annuatim recipiunt de elemosina ecclesie Salzburgensis videlicet duo talenta maioris ligaminis quod Schefpant dicitur transducant libere sine muta ita vt nec a iudicibus nostris seu officialibus ac mutarum nostrarum et theloneorum prouisoribus nomine mute seu thelonei vel cuiuscumque alterius exaccionis nichil ab eis penitus exigatur in sortem pensionis nobis debite quidquid de dictis salibus solvere deberent a mutariis nostris et officialibus computandum Volumus etiam vt si quis de partibus Austrie vel de vectoribus salium eorundem cuiquam de nostris debitor existat racione quacumque propter hoc dictus abbas et conuentus sancte crucis non impediatur vllatenus vel grauetur sed res eorum abire libere permittantur Et vt hec nostre donationis gratia iuxta antiqua ipsius monasterii priuilegia sigillo etiam capituli nostri munita ab omnibus nostris officialibus prouide conseruetur ipsam presentibus litteris et nostri sigilli munimine roboramus Datum Wienne anno domini MCCLXXXIII tercio nonas Aprilis