Charter Document - 03880262
| Charter Number: | 03880262 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1280 |
| Date type: | Internal, A.D., Feast |
| Resource Link(s): |
Monasterium.net |
Charter:
Wichardus dei gratia ecclesie Patauiensis episcopus iudicibus et mutariis suis presentibus et futuris tam Patauie quam in aliis locis circa Danubium et Enum constitutis gratiam suam et omne bonum Scire vos volumus quod dilectis in christo fratribus abbati et conuentui de sancta cruce in Austria Cisterciensis ordinis nostre dyocesis concessimus vt in omni possessionis nostre loco naues duo talenta salis de ligamine maiori quod Schefpant dicitur deferentes singulis annis per Enum et Danubium descendentes ab omni exactione transire libere permittantur Vobis ergo precipiendo mandamus ne ab ipsorum nauibus dictos sales deferentibus neque theloneum neque mutam nec de transitu qui wruar dicitur neque ullius iuris nomine quiquam exigatis aut exigi permittatis et in sortem pensionis nostre quidquid de nauibus supradictis vos recepturos speraueritis conputetis Si quis forte de Austria aut etiam de vectoribus eiusdem salis alicui nostrorum aliquid debuerit propter hoc abbas et conuentus sancte crucis in nullo grauentur aut molestentur sed res eorum abire libere permittantur Et vt hec nostre donationis indulgentia iuxta antiqua dicte ecclesie et conuentus priuilegia a nullo vestrum debeat uiolari precipue cum sigillo nostri capituli et consensu sint muniti presentis scripti et sigilli nostri eos testimonio roboramus Datum apud sanctum ypolitum anno domini MCCLXXX in die Mathei apostoli