Charter Document - 03880255
| Charter Number: | 03880255 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Religious |
| Charter Type(s): | Sale |
| Date: | 1279 |
| Date type: | Internal, A.D., Calendar |
| Resource Link(s): |
Monasterium.net |
Charter:
Acta mortalium que presencium post occasum transire debent ad noticiam futurorum vtpote fundamento stabili conuenit scripturarum testimonio roborari Hac preuia racione ego Levtivinus dictus de Werde notum fieri volo christi fidelibus vniuersis presentibus et futuris quod ius proprietarium seu titulum proprietatis quieta et libera possessione hereditario iure me contingentem in quatuor mansis sitis in Hodreihstorf iuxta Poistorf quos miles quidam de Pruka dictus Irenfridus de Swabdorf et gener ipsius Vlricus cognomine Pes a me feodali titulo possidebant domino Heinrico venerabili abbati monasterii sancte crucis Cysterciensis ordinis et fratribus ibidem deo in perpetuo seruientibus pro viginti talentis denariorum vendidi dicto monasterio libera et quieta possessione perpetuo possidendam Et quia ius proprietatis premisse cum meis couterinis indiuisum habebam per manus et consensum voluntarium fratrum meorum Hadmari et Chadoldi sororis quoque mee Offemie vendicio huiusmodi seu factio me procurante caucius est firmata Promisi eciam et promitto predictos mansos ab omnis aduocacie vsurpacione siue iure eximere vt est iustum Et ut premissa omnia et singula in suo robore perpetuo perseuerent presentem paginam iussi conscribi sigillorum domini Ottonis de Haselow iudicis prouincialis Austrie et mei robore communitam Testes vero huius rei sunt Otto de Haselow iudex generalis Austrie Stephanus de Missow marschalcus Vlricus dapifer de Pilihdorf Chvnradus et Marquardus fratres eiusdem Otto de Perchtoltstorf camerarius Hermannus de Wolkersdorf Vlricus de Vihoven Fridericus dapifer de Lengenpach Henricus Chvnradus Siboto fratres de Potendorf Wernhardus de Eitzinstal Chvnradus de Stelzerdorf et alii quam plures Acta sunt hec anno domini MCCLXXIX sexto decimo kalendas Julii