Charter Document - 03880252
| Charter Number: | 03880252 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1279 |
| Date type: | Internal, A.D., Feast |
| Resource Link(s): |
Monasterium.net |
Charter:
Ego Chvnradus de Purtdorf ad cunctorum fidelium noticiam tenore presencium cupio peruenire quod cum dilecta coniunx mea Margareta viam uniuerse carnis ingressa fuisset pro remedio anime sue et aliorum parentum meorum redditus unius talenti sitos in Velhebrvnne cuius talenti media pars ad me iure proprietario pertinebat altera vero pars media sponsali donacione quoad uitam michi tradita fuerat a parentibus dicte vxoris mee domui sancte crucis in qua sepeliui eam in die sepulture ipsius liberaliter delegaui cum consensu et benigno fauore domine Ofmye socrus mee et filiorum suorum Spanonis et Rudolfi Spanonis et Chvnigundis sororis eorum et eciam filiorum meorum Vlrici Chvnradi Ottonis et omnium heredum meorum tali ordinacione mediante ut lumen quod pie recordacionis Heinricus Span socer meus de bonis suis comparauerat quatenus in cymiterio monachorum omnibus noctibus lucere debuisset in perpetuum sed per desidiam procuratorum monasterii semper neglectum fuerat amodo in sua incensione et luminacione singulis noctibus in sempiternum inexstinquibiliter perseueret Porro in eiusdem talenti redditibus nemo habet ius aduocacie sed sicut ecclesia sancte crucis cetera bona sua sic et ista perpetuo possidebit semper salua libera et quieta In cuius rei testimonium et confirmacionem presentem litteram domui sancte crucis tradidi mei sigilli munimine roboratam Testes quoque hii sunt dominus Otto de Pravnsperch canonicus Nevnburgensis Leo de Pareinsdorf Fridricus de Schafferveld Leupoldus de Snepfenstain Spanones ambo et alii quam plures Actum et datum anno domini MCCLXXIX in diebus Rogacionum