Charter Document - 03880247

Vniuersis christi fidelibus tam presentibus quam futuris nos Liutoldus pincerna dictus de Kvonringen tenore presentium demonstramus quod cum quidam Vlricus cognomento Goler venerabiles in christo dominum Hainricum abbatem et conuentum fratrum monasterii sancte crucis Cisterciensis ordinis super duabus vineis que vulgariter Vrowein dicuntur questione diutina impulsaret asserens ipsas prefato monasterio donatas a suis progenitoribus sub conditione huiusmodi vt tam ipse quam sui coheredes vinum quod in curte predictorum fratrum que Talarn vocatur annis singulis transuasandum foret deberent sub deputato ad hoc mercedis premio transuasare quam assertionem abbas et fratres memorati legaliter et probabiliter reclamantes licet quiete possessionis prescriptione legitima immo sic diutina et antiquata vt principale dictarum vinearum donum sibi factum nullius viuentis teneret recordatio multisque modis aliis legalibus atque iustis antedictas querelas euadere potuissent tamen quia sententiarum diuersitas causam in longum protrahens vtrique parti onerosa et sumptuosa fuit placuit viro discreto Heinrico de Goettinsvelde magistro cellerarii qui nostro nomine vt officii sui iuris est ipsius cause iudex fuit medium se interponere cuius instantia sepe dictos abbatem et fratres ad hoc induxit vt propter expensas et laborum curas redimendas memorato Vlrico darent duodecim solidos denariorum wiennensium quibus ille acceptis mox viua voce voluntarie ac libere renuntiauit omni iuri quod habere se posse dicebat in vineis memoratis Sed et liberi eiusdem Vlrici ac tres vterine sorores ipsius ceteri quoque coheredes sui viua et libera voce renuntiationem huiusmodi sunt professi coram astantibus viris prouidis Gerungo et Gotfrido magistris montium Heinrico dicto Pellifice et Ottone dicto Tokhner qui ad hoc audiendum specialiter fuerant designati Vt autem hec in robore perpetuo perseuerent ad instantiam partis vtriusque litteras istas conscribi nostroque sigillo iussimus roborari Testes autem huius rei sunt Hainricus de Goettinsueld magister cellerarii Albero dictus Fewselo Vlricus de Weideruelde milites Kalohus ciuis in Pruka Ernestus dictus Swortzl Gerungus et Gotfridus magistri montis Heinricus Pellifex Otto Tokener Vlricus Pauo Gundoldus officialis de Drumowe et alii quam plures Acta sunt hec anno domini MCCLXXVIII kalendis Aprilis