Charter Document - 03880232

Charter Document - 03880232


Charter Number: 03880232
Cartulary Title: Heiligenkreuz Stiftsarchiv Urkunden 1133 - 1775 [1350]
Charter Language: Latin
Charter Origin: Lay
Charter Type(s): Confirmation
Date: 1276
Date type: Internal, A.D., Calendar
Resource Link(s): Monasterium.net

Charter:

Heinricus dei gracia palatinus comes Reni dux Bawarie omnibus christi fidelibus presentem paginam inspecturis in perpetuum Consideracione interna habita recognoscimus ut tenemur quod diuine clemencie que in principatus solium nos vocauit obligati sumus aliqua vicissitudine respondere maxime consulendo ecclesiarum profectibus et intempnitatibus precauendo Sane feruenti allecti dulcedine circa ordinem Cysterciensem gracias factas per predecessores nostros nec non duces Austrie confirmamus et presentibus innouamus videlicet vt per omnes mvotas seu thelonea nostri dominii scilicet Pvrchhovsen Scherdingen Nevnburch Lintz fratres ecclesie sancte crucis in Austria Cysterciensis ordinis Pataviensis dyocesis duo talenta salis maioris ligaminis semel in anno ducere valeant sine mvota omni exactione et retardacione nostris officialibus interdicta quippe cum ob nostram salutem indulta per nostros uelimus foueri et prosequi et nullo modo impediri tamquam eos qui debent omnibus intendere que nostre saluti fuerint profutura et ad conseruacionem talis gracie heredes nostros et posteros obligamus Vidimus siquidem hanc graciam dictis fratribus per instrumentum domini Friderici pie memorie ducis Austrie in hunc modum concessam Fridericus dei gracia [] More patris nostri clare memorie bonis benefacere cupientes scire volumus vniuersos quod abbati et conuentui sancte crucis concessimus vt navis cum sale ipsorum videlicet duobus talentis maioris ligaminis quod dominus archiepiscopus Saltzburgensis dicto conuentui annis singulis conferet in omni loco nostri dominii ab omni exaccione mvte seu thelonei semel in anno sine quolibet impedimento libere valeat pertransire Quod vtique instrumentum perspeximus in sigillo verum non cancellatum non abolitum nec in aliqua sui parte vt manibus contrectavimus viciatum Eandem graciam serenissimus imperator Fridericus confirmauit vt in suo perspeximus instrumento Nec non dominus Otakarus rex Bohemie premissam libertatem dicte ecclesie suis dedit instrumentis et nos iam dudum per totum nostrum dominium ab omni exaccione thelonei et mvte liberos eos reddidimus et immunes Quare ne aliquam de cetero in permissis calumpniam paciantur sed predictum numerum salium semel in anno ducant libere sine mvta presentem litteram eis damus nostri sigilli munimine roboratam Actum et datum Wienne anno domini Millesimo ducentesimo septuagesimo sexto kalendis Decembris indiccione quarta