Charter Document - 03880222
| Charter Number: | 03880222 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1275 |
| Date type: | Assigned |
| Resource Link(s): |
Monasterium.net |
Charter:
Nouerint uniuersi presentis pagine inspectores quod ego Otto miles dictus de Arnstein habens respectum ad uite premium postfuture de patrimonio meo quod in Grauendorf tranquillo iure actenus possideo et possedi fratribus in sancta cruce unius talenti redditus condonaui ut eis ex hoc in perpetuum annis singulis in die beati Gregorii ad communem eorum mensam qualiscumque consolatio preparetur habito prius recursu ad me uel ad uxorem meam aut ad filium natu priorem aut ad quemcumque hec hereditas deuoluetur Quod si per procuratores dictorum fratrum non a parte mea hoc memoriale meum subtractum fuerit aut aliqualiter infirmatum ad heredes meos dictum talentum libere reuertetur nisi forsan memoratum predium ex generali turbacione terre fuerit rapinis uel incendio desolatum aut alio casu qui possit legitimus comprobari nec licebit prenotatis fratribus ius suum uendere aut obligare uel quoquo modo ab ecclesia sua alienare nisi forsan in concambio quod tamen nisi euidenter eis magis expediat minime poterunt celebrare Adicio quoque si ego aut heres meus prior natu uidelicet ad quem semper hec procuratio pertinebit aut noster nuntius huic conuentus solatio uoluerit interesse ita ueniant ne eorum presentia non modo grata sed domui fiat forsitan onerosa Ut hec rata permaneant hanc cartam sigillo meo munitam ipsis fratribus dedi abbatis sui econtra sigillum accipiens super articulis prenotatis