Charter Document - 03880211
| Charter Number: | 03880211 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1273 |
| Date type: | Internal, A.D., Feast |
| Resource Link(s): |
Monasterium.net |
Charter:
In nomine domini amen Vt malignorum hominum fraudulenta cauillatio que bonorum cordium actus et studia vulnerare consueuit caucius euitetur obiectandus est illi clypeus testimonii earum personarum que ueritatem diligunt et sectantur Sub adtestacione igitur nobilis et perlucide discretionis viri domini Ottonis de Haselowe iudicis prouincialis Austrie et capitanei in Prukka ego Alhaidis soror Haimonis quondam capitanei in Prukka pro remedio anime mee redimendisque peccatis progenitorum meorum partem tertiam molendini extra muros ciuitatis in Prukka siti in loco qui dicitur antiqua ciuitas quam iure hereditario ad me deuolutam in quiete pacis diutina possedi monasterio sancte crucis Cysterciensis ordinis dedi absolute pleno iure perpetuo possidendam cedensque adhuc uiua possessioni eiusdem eam libere domino Hainrico abbati et fratribus dicti monasterii ad manus fratris Alberti monachi domus eiusdem assignaui qui mihi denuo nomine iam dicti abbatis et conuentus sub infeodacionem iuris ciuilis sepe dictam molendini partem ad solius uite mee dies contulit ita ut eis de ipsa XII denarios annis singulis in festo beati Mychahelis persoluam et post dies meos inmediate nullo exceptionis medio interiecto eadem illis cum omni usu fructuario perpetuo remanebit In huius rei testimonium presentem litteram conscribi uolui sigillorumque domini O videlicet de Haselowe iudicis prouincialis Austrie et capitanei in Prukka nec non domini Henrici plebani loci eiusdem communitatisque ciuium ibidem caracteribus comuniri cum testibus subnotatis qui sunt isti Dominus Heinricus plebanus in Prukka dominus Gerhardus sacerdos ipsius socius dominus Eberhardus miles de Haselowe Chalohus Matzlo Chunradus dictus Rebstoch Heinricus dictus Auus Minhardus dictus Gerwer ciues in Pruka Vlricus iudex de Winden et alii quam plures Actum in Prukka in parochiali ecclesia anno domini MCCLXXIII in die sancti Thome apostoli feliciter amen