Charter Document - 03880157
| Charter Number: | 03880157 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1259 |
| Date type: | Internal, A.D., Calendar |
| Resource Link(s): |
Monasterium.net |
Charter:
Ut litterarum breui compendio a future obliuionis dispendio declinetur est expediens ac honestum humanam memoriam scripture stipendio militare Ad humane igitur vniuersitatis noticiam tam presencium quam futurorum christi fidelium deueniat per presentes quod cum Rudgerus de Losenhaim de consensu Tute vxoris sue et liberorum suorum quosdam redditus in hovelin et hortos sitos ibidem abbati et fratribus in sancta cruce pro anime sue remedio libere contulisset quos redditus Wisinto de Houelin ab eodem Rudgero feodaliter possidebat et uterque eorum Rudgerus videlicet iuri proprietatis et Wisinto infeodationis cessisset ius suum sancte crucis conuentui libere assignando tandem super eisdem redditibus inter fratres de domo teutonica in Wienna ex una parte et fratres de sancta cruce ex altera lis est orta affirmantibus fratribus de domo teutonica predictam donacionem ex parte Wisintonis factam infirmam esse ex cuiusdam condicionis debito et non ratam Et cum utrimque inter predictos fratres verteretur controuersia tandem ne tunica caritatis inconsutilis scinderetur que inter easdem domos et fratres floruerat ab antiquo quodam priuilegio singulari amicabili compositione ipsis fratribus mediantibus eadem lis taliter est decisa ut fratres de sancta cruce de predictis redditibus in hovelin haberent trium talentorum redditus residua uero pars reddituum eorundem ad fratres de domo teutonica volueretur Ne uero huius amicabilis compositionis firmitas a posterorum memoria laberetur frater Chonradus comendator Austrie et frater Ortolfus comendator domus in Wienna presentem litteram sigillorum suorum munimine confirmarunt testibus subnotatis qui sunt frater Chonradus de Veuhtwanch comendator Austrie frater Ortolfus comendator in Wienna frater Ortwinus cellerarius domus eiusdem frater Dietricus sacerdos De sancta cruce fratres Mechtfridus cellerarius Fridericus camerarius Chonradus elemosinator Heinricus quondam magister curie in Vlreichschirchen Geroldus magister curie in Wienna et alii quam plures Datum anno domini MCCLVIIII XIII kalendas Junii