Charter Document - 03880144
| Charter Number: | 03880144 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1257 |
| Date type: | Internal, A.D. |
| Resource Link(s): |
Monasterium.net |
Charter:
In nomine sancte et indiuidue trinitatis amen Nos Heinricus de Seveld omnibus presentem paginam inspecturis in perpetuum Cum nos apud cenobium sancte crucis elegerimus sepulturam pro spe nobis future beatitudinis proponentes ut inter religiosos et dei servicio iugiter mancipatos nostre dormicionis et beate resurrectionis consortium habeamus tenore presentium innotescimus uniuersis tam presentibus quam futuris quod nos pro anime nostre remedio et salute omniumque progenitorum ac heredum nostrorum perhenni felicitate iamdudum contuleramus ecclesie memorate libera et legitima donatione alterum dimiduum mansum in Wlzinshouen et pro redditibus trium talentorum abbati et conuentui dicti loci assignaueramus duos mansos sitos in Gelanstorf donec pro dictis redditibus trium talentorum ipsis a nobis uel a nostris heredibus concambium ualens et competens in aliis possessionibus traderetur statuentes ut de omnibus exinde prouenientibus annuatim in die beati Nycolai pro solatio conuentus plenum seruitium hoc est in simila piscibus et uino meliori honesta refectio haberetur Item uineta que habuimus in Phafsteten cum areis et omnibus pertinenciis aliis delegaueramus post nostrum obitum prefato cenobio sancte crucis ordinantes ut de eisdem in die anniuersarii nostri annis singulis memorato conuentui refectio consolatoria donaretur prout superius in die beati Nycolai modum distinximus seruiendi Tandem uolentes magis ad magis domino complacere et pro uberiori in coelis messione in terris amplius seminare dicta uineta in Phafsteten cum areis et omnibus pertinentiis libere et absolute beate virgini et sancte cruci tradidimus quiete et libere a memoratis fratribus in perpetuum possidenda ita ut redditus trium talentorum in Gelanstorf assignati exinde recompensentur et duplex seruicium uidelicet in die beati Nycolai et in die nostri anniuersarii annuatim inuiolabiliter persoluatur Ut autem hec donatio et ordinatio apud nos et heredes nostros robur obtineat firmitatis perpetue presentem paginam conscribi et sigillo domini nostri comitis Ottonis de Plagen nostro quoque et aliorum amicorum nostrorum sigillis fecimus communiri Huius rei testes sunt illustris comes Otto de Plagen Albero de Velsperch dapifer Austrie Albero de Chunringe pincerna Austrie Chvnradus de Hintperch Otto de Perhtoldestorf Rudolfus de Potendorf Otto de Prvnne Otto Turso Chvnradus Maze Ulricus de Rar Otto de Haslowe Wisinto scriba Pilgrimus de Valwa Rudlinus de Molt iudex in Seveld et Heinricus frater eius et alii quam plures Actum anno domini MCCLVII