Charter Document - 03880141
| Charter Number: | 03880141 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1256 |
| Date type: | Internal, A.D., Calendar, Regnal |
| Resource Link(s): |
Monasterium.net |
Charter:
Bela dei gracia Hungarie Dalmacie Croacie Rame Seruie Gallicie Lodomerie Cumanieque rex uniuersis presentes litteras inspecturis salutem in omnium saluatore Ad uniuersorum tam presencium quam futurorum noticiam harum serie uolumus peruenire quod cum statum castrorum nostrorum in regno nostro existencium per hostilem thartarorum introitum confusum pariter et turbatum in terris et hominibus a castris alienatis ad eadem reuocandis uoluissemus post ipsorum recessum reformari et super quadam terra iuxta fluuium Saar existente que Curia regis uocatur nec non super medietate terre bissenorum que Legvontov nuncupatur quas fidelis noster abbas sancte crucis de Austria nomine eiusdem ecclesie ex donacione regia tenuerat exorta fuisset materia questionis tandem quia constitit nobis euidenter per nostrum priuilegium ante aduentum thartarorum datum et optentum et etiam per instrumenta nostrorum progenitorum easdem sibi collatas hactenus tenuisse aliis quibusdam terris castri nostri ab ipso reuocatis que fuerant occupate prefatas terras cum omnibus suis pertinenciis et iuribus apud predictum abbatem et ecclesiam sancte crucis duximus perpetuo et irretractabiliter relinquendam presenciumque auctoritate ipsi ecclesie confirmandam cum etiam heedem tempore reuocacionis perpetuitatum fuerint reuocate Prefata autem terra que Curia regis uocatur certis metis et antiquis hoc ordine est distincta Prima meta uidelicet sumit inicium ad septemtrionem a fluuio qui uocatur Saar Deinde protenditur ad orientem iuxta riuulum qui fluit in predictum fluuium Saar Deinde ascendit planiciem minimi montis et descendit in uallem arundinetorum Deinde ascendit ad uiam a meridiana plaga ante siluam cuius nomen Hagenawe que silua patrimonium est filiorum comitis Stephani Deinde descendit in magnam uallem ad occidentem et transit ultra magnam uiam et tandem terminatur in prenominato fluuio Saar Ut igitur hec nostra collacio seu eiusdem confirmacio robur obtineat perpetue firmitatis presentes concessimus litteras duplicis sigilli nostri munimine roboratas Datum Jeurini anno domini Millesimo ducentesimo quinquagesimo sexto IX kalendas Julii regni autem nostri anno vicesimo primo