Charter Document - 03880121
| Charter Number: | 03880121 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1250 |
| Date type: | Internal, A.D. |
| Resource Link(s): |
Monasterium.net |
Charter:
In nomine sancte et indiuidue trinitatis Quoniam labente temporum curriculo necesse est exigente humane generacionis mutabilitate et temporis diuturnitate labencium hominum labiliorem memoriam obliuionis nubilo obfuscari ne venture generacioni preiudicium aliquod ex nostra ordinacione possit aliquatenus generari aut certa in dubium cedere ambiguitatis memoriale rerum a nobis gestarum posteris sub presenti pagina exhibemus fideliter recolendum Cunctorum igitur auribus presencium tenore declaramus quod ego R abbas sancte crucis et fratres eiusdem conuentus ordinis Cysterciensis curiam in Smidbach sitam nostre congregacioni et ordini a Chunrado cognomento Holzman qui diuina gracia inspiratus claustrali discipline vna nobiscum sub habitu monastice religionis militaturus se personaliter associans intra cetera possessionem suarum predia iam dictam curiam pro anime sue salute et premio uite eterne libere condonauit Fridrico de Smidbach sub annuali pensione secundum cursum et comunem consuetudinem iuris ciuilis contulimus possidendam hac dumtaxat condicione adiecta vt si memoratus F statutam pensionem unam libram denariorum abbati et congregacioni in die Michahelis soluere distulerit vel contempserit ipso facto prefata curia cum omnibus ad ipsam pertinentibus absque omni contradictione ad abbatis redeant iurisdictionem nec ab eo nec ab aliquo liberorum suorum aut amicorum qui sibi hereditario iure canonice succedere possunt decetero repetenda Vt autem vniuersa hec vigorem obtineant firmitatis scripta et gesta sigilli nostri munimine roboramus Actum anno domini MCC quinquagesimo