Charter Document - 03880113

In nomine sancte et indiuidue trinitatis amen Nos Heinricus de Sevelt presenti scripto scire uolumus vniuersos quod cum apud reuerendum cenobium sanctumque collegium domus sancte crucis nobis elegerimus sepulturam diuine remunerationis intuitu adque pietatis dum ob remedium omnium parentum nostrorum dum heredum quos habemus vel sumus in posterum habituri dum precipue in anime nostre remedium et ivuamen subsidium pariter et solamen quod nunc in modum ordinauimus testamenti venerabili cenobio domus sancte crucis reuerendisque fratribus ibidem deo famulantibus in seruitio Jesv christi dedimus donauimus tradidimus manu libera ac potestatiua donationis nomine ac libertatis alterum medium beneficium in Wulzinshoven quod iusto titulo possedimus et quiete ad nos pertinens non nomine hereditatis set iure equanimiter emptionis Item singulis annis temporibus vite nostre ipsis dabimus carratam vini tamdiu quoadusque ipsis assignabimus redditus trium talentorum Sane igitur si medio tempore ante donationem siue dationem reddituum trium talentorum morte fuerimus occupati hodie et tunc temporis decessionis nostre ipsis monstrauimus donauimus et dedimus manu libera intuitu pietatis duos mansos sitos in Gelansdorf videlicet mansum Echindorfarii et mansum Gebhardi de Grovbe Quodsi post decessionem nostram uel tempore procedente heredes nostri pro ipsis redditibus trium talentorum in Gelansdorf dare voluerint concambium ipsi cenobio reuerendo in loco aliquo competenti qui abbati idoneus esse uideatur volumus et rogamus ut eosdem redditus trium talentorum in concambium venerabilis abbas cum fratribus reuerendis debeant acceptare Enimuero quia viva voce cum corporis sospitate hec dedimus ordinauimus donauimus nomine testamenti in venerabili capitulo domus sancte crucis existente ibidem sancto collegio cum abbate de quorumdam prudentium nec non uirorum venerabilium religiosorum consilio hoc precedens ut presens testamentum taliter ordinemus quod de istis redditibus annuatim in die beati Nycolay dicto conuentui reuerendo plenum seruitium hoc est in simulis piscibus ualentibus atque bono vino non de conuentuali vino quod ipsis fratribus cottidie ministratur caritativa humilis ac devota vtilis et honesta refectio tribuatur vt per hanc igitur refectionem eo die possit sanctum collegium collaudare ceteris pre diebus merita beatissimi Nycolay atque clementiam saluatoris nostrique in orationibus ac missarum sollempniis meminisse Item vineta que habemus in phaffsteten cum omnibus ibidem pertinentiis constitutis damus tradimus atque donamus post decessionem nostram cenobio iam prefato Hoc adiuncto ac taliter huic statuens testamento ut de vsufructu ipsarum uinearum in die anniversarii nostri singulis annis iam dicto sancto collegio domus sancte crucis plenum seruicium tunc donetur secundum quod superius in die beati Nycolay modum distinximus seruiendi Quidquid vero super illa duo plenaria seruicia videlicet beati Nycolai et in die anniversarii nostri superhabundauerit omni anno abbas cum yconomo dicti claustri in usus cenobii redigant ut est iustum prouisuri ne in fraudem istius testamenti aliquid adtemptetur per quod plenum modum ipsi conuentui possint negligere seruiendi Ad hoc patere volumus vniuersis quod si aliquo tempore siue anno venerabilis abbas cum yconomo memorato negligerent ipsum modum quem instituimus seruiendi ex tunc volumus in instanti ut prefati redditus in Wulzinshofen Phaffstetten Gelansdarf uel concambium quod pro eisdem redditibus in Gelansdorf heredes nostri dabunt videlicet redditus trium talentorum ad eosdem heredes nostros quos habemus uel sumus in posterum habituri adequaliter deuoluantur nisi forte contingat quod propter incendium uel rapinam aut alia discrimina eisdem fratribus de predictis redditibus secundum supra scriptum modum non possit plenarie ministrari Promiserunt etiam nobis venerabilis abbas cum fratribus reuerendis quod ubicumque locorum ista parte montium morte fuerimus occupati si ita contingeret quod deus auertat quod ad prefatum claustrum propter quamcumque necessitatem a nostris perduci equanimiter non possemus venerabilis abbas cum sancto collegio nos suis expensis ad eorum cenobium deportabunt morem nobis sepeliendi debitum inpendendo Et quia eo die quando ista ordiuauimus nomine testamenti in reuerendo capitulo sancte crucis venerabilis abbas cum fratribus reuerendis omnium bonorum laborum orationum missarum que apud ipsos fiunt uel decetero erunt participes nos fecerunt ac in eorum fraternitatem et consorcium per pacis osculum acceperunt ipsosque reuerendos fratres abbatem et pium conuentum deuote ac fraterne monuimus deprecando ut quandam crucem cum reuerendo et adorando ligno domini et aliis reliquiis reuerendis nobis temporibus uite nostre comodarent quam peticionem nostram fauorabiliter et deuote pie et salubriter admiserunt et nos e conuerso ipsi sancto collegio promisimus fide data quod eandem sanctam uenerandamque et adorandam crucem domini cum reuerendis reliquiis nobis datis et cum altera nostra sancta et adoranda cruce ac nostris reliquiis reuerendis post obitum nostrum in anime nostre subsidium et solamen legamus ipsi cenobio iure testamenti et conuentui memorato Vt igitur iustum pium humile et benignum sanctumque intentionis nostre propositum et deuotum cum omnibus prenotatis robur apud nos et heredes nostros obtineant firmitatis et a nullo heredum nostrorum uel ab aliquo alio possint de cetero retractari presens testamentum ad peticionem nostram cum sigillo domini nostri illustris comitis Covnradi de Plagen nec non cum sigillis consanquineorum et amicorum nostrorum videlicet Alberonis de Veldesperc dapiferi Austrie Rapotonis et Hadmari fratrum de Sconenberc et ipsius abbatis atque nostro cum testibus infra scriptis cenobio prenotato perpetuo nomine testamenti duximus roborandum Sunt igitur hii testes illustris comes Chvnradus de Plagen Albero de Veldsperc Rapoto et Hadmarus fratres de Sconenberc Heinricus de Prunne Chvnradus de Himperc Rudolfus de Potendorf fratres de Pertholdesdorf Otto et Heinricus Celeubus Dietricus scriba de Zebinge Rvdgerus iudex de Sevelt Wigandus et Heinricus fratres carnales fratris Wipotonis ordinis nostri Liupoldus Gogman Sidlo frater ante dicti iudicis Sengo camerarius Albero cocus Rvdelo seruus antedicti scribe Acta sunt hec anno ab incarnacione domini MCCXLVI indictione IIII Epacta nulla concurrente VII VIII kalendas Julii die solis et in die beati Johannis Baptiste anno Solaris cycli XXIII anno lunaris cycli XII annis terminis vt supra legitur constitutis