Charter Document - 03880084

Charter Document - 03880084


Charter Number: 03880084
Cartulary Title: Heiligenkreuz Stiftsarchiv Urkunden 1133 - 1775 [1350]
Charter Language: Latin
Charter Origin: Papal
Charter Type(s): Mandate
Date: 1235
Date type: Internal, Papal
Resource Link(s): Monasterium.net

Charter:

Gregorius episcopus seruus seruorum dei dilectis filiis abbati et conuentui sancte crucis Cisterciensis ordinis Patauiensis diocesis salutem et apostolicam benedictionem Si adhuc Amalech persequitur Israhelem dum cupidi et auari uiros religiosos deum videre per contemplationis otium cupientes non solum aperta seuitia uerum etiam subdola calliditate multipliciter inquietant nos qui ueri Moysi uices licet immeriti gerimus debemus illorum refragari conatibus et uersutiis obuiare ne uirgam peccatorum super sortem iustorum relinquere uideamur Ex parte siquidem uestra fuit propositum coram nobis quod nonnulli clerici et laici non tam iustitiam suam prosequi quam uos persequi dampnabiliter intendentes uos ultra duas pluresue dietas a monasterio uestro per litteras apostolicas faciunt malitiose citari ut fatigati laboribus et expensis uel cedere litibus uel dampnosas subire compellamini pactiones Vt igitur sapientia uincat sua suauitate malitiam cum experimento sciamus quam sit amarum sancte contemplationi uacantibus distrahi litibus odiosis uolentes quantum cum deo possumus uestre quieti consulere ne de cetero ultra duas dietas a monasterio proprio super bonis que infra ipsas habetis per litteras apostolicas trahi possitis in causam auctoritate uobis presentium indulgemus nisi littere ipse de hac indulgentia fecerint mentionem Nulli ergo omnino hominum liceat hanc paginam nostre concessionis infringere uel ei ausu temerario contraire Si quis autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum Datum Perusii idus Februarii pontificatus nostri anno quarto