Charter Document - 03880070
| Charter Number: | 03880070 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1232 |
| Date type: | Internal, Calendar, Papal |
| Resource Link(s): |
Monasterium.net |
Charter:
Gregorius episcopus seruus seruorum dei dilectis filiis abbati et conuentui de sancta cruce Cisterciensis ordinis Patauiensis diocesis salutem et apostolicam benedictionem Sacrosancta romana ecclesia deuotos et humiles filios ex assuete pietatis officio propensius diligere consueuit et ne prauorum hominum molestiis agitentur eos tamquam pia mater sue protectionis munimine confouere Eapropter dilecti in domino filii uestris iustis postulationibus grato concurrentes assensu personas uestras et locum in quo diuino mancipati estis obsequio cum omnibus bonis que in presentiarum rationabiliter possidetis aut in futurum dante domino iustis modis poteritis adipisci sub beati Petri et nostra protectione suscipimus Specialiter autem mansos terras possessiones redditus et alia bona que quondam Henricus dictus senex de Cebing miles et Wichardus et Tuta uxor eius ac eorum filii monasterio uestro et hospitali quod apud idem monasterium propriis sumptibus construxere pietatis intuitu prout proponitis contulerant sicut ea omnia iuste ac pacifice possidetis uobis et per uos monasterio ac hospitali predictis auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre protectionis et confirmationis infringere uel ei ausu temerario contraire Si quis autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum Datum Spoleti IIII kalendas Junii pontificatus nostri anno sexto