Charter Document - 03880055

In nomine sancte et indiuidue trinitatis amen Fridericus secundus diuina fauente clementia Romanorum imperator semper augustus Jerusalem et Sicilie rex Desiderium quod ad religionis propositum et quietem noscitur pertinere animo nos decet libenti concedere et petencium uotis imperiale suffragium inpertiri Ea propter notum esse uolumus vniuersis fidelibus nostris imperii tam presentibus quam futuris quod nos ad supplicacionem tuam deuotam frater Wernhere venerabilis abbas monasterii sancte crucis in Austria Cisterciensis ordinis fidelem nostram personam tuam et monasterium tuum nec non et fratrem Gebhardum venerabilem abbatem monasterii in Lilienuelde eiusdem ordinis et monasterium tuum te fratrem Heinricum venerabilem abbatem monasterii in Zwetel eiusdem ordinis et ipsum monasterium tuum te fratrem Rudgerum venerabilem abbatem monasterii in Boumgartenberge eiusdem ordinis et ipsum monasterium tuum quorum tria monasteria subsequencia post monasterium sancte crucis ab eodem monasterio deriuata fuisse noscuntur sub imperiali protectione et defensione recipimus speciali firmiter in perpetuum statuentes ut quecumque bona quascumque possessiones predicta monasteria uestra a temporibus fundationis eorum usque ad hec felicia tempora nostra rationabiliter tenuerint et uos iuste similiter possidetis aut in futurum prestante domino iustis modis poteritis ad hibisci eisdem monasteriis uestris uobis etiam et successoribus uestris firma semper et tranquilla permaneant Quecumque etiam iura quecumque exemptiones libertates a felicibus imperatoribus predecessoribus nostris uel ab aliis imperii principibus rationabiliter eisdem uestris monasteriis sunt collata uel iuste de cetero conferantur uobis predictis abbatibus et successoribus uestris ac ipsis monasteriis rata omni tempore integraque seruentur Quibus illud addicimus et imperiali sanctione statuimus quod sicut ordo Cisterciensis ab exordio sue institucionis nullis unquam fuit obnoxius aduocatis ita predicta monasteria uestra omnesque possessiones uestre ab omni aduocatorum ratione atque exactione sint libere tam communi ordinis libertate quam presenti nostra constitucione et confirmacione exempte Paci insuper et imunitati uestre uestrorumque successorum de imperiali clemencia prouidentes inhibemus omnino ne quis monasterii aut ullius predii uestri aduocatiam in feudo a quoque habeat uel habere ullo nomine aut iure ualeat nec donationis alicuius predii ratione seu commisse aut expedite defensionis occasione uel quasi a progenitoribus hereditaria successione nomen et ius aduocati in uos aut uestra sibi quispiam uendicet et assumat sed quodcumque predium uestris monasteriis et uobis est hactenus uel amodo fuerit in helemosinam datum aut aliis iustis modis acquisitum imperiali tuicioni eo ipso subiacebit quo uestrum esse cepit Verum quia remoti a nobis maiestatis nostre presentiam adire quotiens expedit non ualetis ne quod iuri aut utilitatibus uestris exinde ualeat deperire defensorem uobis eum dumtaxat quem uos ipsi ad hoc elegeritis deputamus et habere concedimus cui in uestra defensione in contractibus in causis ciuilibus et in aliis ciuilium negociorum transactionibus nostre uicis executionem non in feudo habendam non perpetuo optinendam neque heredibus relinquendam sed salua uestra libertate comittimus ita ut liberum uobis esse debeat recusare eum et alterius defensioni uos et uestra comittere si sub nomine defensoris se uobis exhibuerit offensorem si immunitatis uestre priuilegium ullo uexationum aut exactionum genere infringere et euacuare uoluerit Volumus enim nostre potestatis executores nostre pietatis habere sectatores firmiter statuentes ut qui nostra iussione uel ex uestra peticione seu quacumque occasione uos et uestra defendunt liberaliter sincere ac pro sola dei retribucione defendant ita ut neque banna neque peticiones quas steuras uocant neque pernoctaciones neque operarios nec ulla omnino seruicia ab inuitis uobis uel colonis uestris sub optentu defensionis exigant aut extorqueant colloquia in locis uestris placita cum colonis uestris nulla prorsus habeant de uestris placitis que cum uestris colonis habere uolueritis nisi a uobis rogati se nullatenus intromittant et indulta uobis exemptionum priuilegia nulla ui uel fraude conuellant Decernentes insuper ut nulli omnino hominum fas sit abbates predictos et successores uestros super hac confirmatione et constitucione nostra perturbare bona et possessiones uestras et monasteriorum uestrorum auferre uel ablatas iniuste detinere aut temerariis uexationibus fatigare sed omnia uobis et successoribus uestris integre conseruentur usibus uestris et pauperum christi decetero profutura Si quis autem in posterum huic nostre confirmationi et constitutioni temere contraire presumpserit indignacionem imperialis culminis grauiter se nouerit incursurum et pro tante temeritatis excessu centum libras auri puri pro pena componat medietatem camere nostre reliquam medietatem passis iniuriam persoluendam Ad huius itaque confirmationis et constitutionis nostre memoriam et robur perpetuo ualiturum presens priuilegium per manus Jacobi de Cathania notarii et fidelis nostri scribi jussimus sigillo maiestatis nostre munitum Huius rei testes sunt hii Ekibertus Babinbergensis episcopus Siffridus Ratisponensis episcopus Lodoycus langrauius Turingie Renaldus dux Spoleti Tuscie legatus Hermannus et Lodoicus comites de Froburc Siffridus de Runkel et alii quam plures Signum domini nostri Friderici secundi dei gracia illustrissimi Romanorum imperatoris semper Augusti Jerusalem et Sicilie regis Acta sunt hec anno dominice incarnationis Millesimo ducentesimo vicesimo septimo mense Augusti quinte decime indictionis regnante domino nostro Friderico secundo dei gracia inuictissimo Romanorum imperatore semper Augusto Jerusalem et Sicilie rege imperii eius anno septimo regni Jerusalem secundo regni uero Sicilie tricesimo anno feliciter amen Datum Melfie anno mense et indictione prescriptis