Charter Document - 03880051

A dei gracia Hungarie rex omnibus presens scriptum inspecturis salutem et omne bonum Ad uniuersorum noticiam presentium et posterorum uolumus peruenire quod abbas et totus conuentus de monte sancte Marie ad nostram accedentes presentiam asseruerunt quod Bors filius Dominici Bani ad quem ius patronatus eiusdem ecclesie pertinebat multa dampna et iniurias populo dicte ecclesie intulisset Nos igitur qui ex officii nostri debito utilitati et comodo omnium ecclesiarum diligenti prouidentia tenemur inuigilare ne iam dicta ecclesia dampnis inrecuperabilibus ulterius agrauetur fideli nostro Nicholao comiti commisimus defendendam ita ut quicumque iobagionum nostrorum siue ipse Bors siue alii super populos ecclesie uiolenter descensum facere uoluerint ipse N comes nostra auctoritate prohibeat Verumtamen ius patronatus a iam dicto Bors non abstulimus sed statuimus ut omnes prouentus qui a nobis uel a nostro antecessore rege Hemerico bone memorie eidem ecclesie fuerant collati uidelicet in prediis eorum que sic nominantur in Maynhart in Laztay in Prezing in Mychsa ceterisque terris ad ipsos pertinentes siue de cybionibus de tributis forensibus seu etiam de liberis denariis uel etiam in salibus quod totum eiusdem ecclesie pro remedio anime nostre contulimus ad ipsum Bors in nullo debeant pertinere sed ad ecclesie usum specialiter recipiantur quod si ipse Bors ad usum suum iam dictos prouentus accipere uoluerit comes N sibi resistat et nullo modo eum uel alium recipere permittat Preterea uniuersi populi ecclesie coram nullo iudice preter nos uel etiam ipsum N astare debeant quoniam nos sepedicto N comiti ipsos commisimus discutiendos Quodsi fortuitu ad aliquos iudices citati fuerint comes N ab omni iudicio iudicum preter nos ipsos recipiat Et ut nostra dispositio firma perseueret presentes concessimus litteras duplici sigillo nostro roboratas Datum anno verbi incarnati MCCXXIIII regni nostri anno XXI