Charter Document - 03880036
| Charter Number: | 03880036 |
|---|---|
| Cartulary Title: | Heiligenkreuz Stiftsarchiv Urkunden 1133 - 1775 [1350] |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1216 |
| Date type: | Internal, A.D. |
| Resource Link(s): |
Monasterium.net |
Charter:
In nomine sancte et individue trinitatis Liupoldus dei gratia dux Austrie et Stirie universis Christi fidelibus presentis etatis et future generationis in perpetuum Cum inter monasteria Medlic ac sanctam crucem eorumque abbates super decimis questio diuturna verteretur eaque adeo intricata appareret uti per iudicium vix decidi posse uideretur nos pro debito nostri patronatus utilitati pacique utriusque cenobii consulentes studium nostrum interposuimus litemque diu tractam cum consensu parcium sic decidimus ut qualescumque possessiones cenobium sancte crucis ante concilium lateranense anno dominice incarnationis MCCXV celebratum in parochiis Draskirchen et Medlic habebat de his nullas decimas cuiquam debeat sed pro decimis quatuor carratas musti Medlicensibus annuatim solvat de musto et mensura ville baden sterilitate aut alio infortunio non obstante Excipiuntur autem sole ille vinee quarum decimas Liupoldus pincerna noster in feodo habet ab ecclesia Medlicensi que decime si quandoque a feodali iure vacaverint ad ecclesiam Medlicensem pertinere debebunt Ceterum si quas vineas aut agros fratres sancte crucis a suis proprietatibus venditione donatione concambio aut aliis modis alienaverint decimas exinde Medlicensibus solvent hii in quorum proprietatis ius transierunt Item si predicti fratres sancte crucis agros in vineas aut vineas in agros sive grangias in villas aut villas in grangias commutaverint ac redegerint dummodo ab eorum proprietate non discesserint nullas ex hoc decimas soluere teneantur De his vero possessionibus quas post supradictum lateranense concilium acquisierint decimas ex integro iuxta eiusdem concilii statutum solvent Et quoniam sepe dicta cenobia maxime super vinearum decimis contendebant vineas sancte crucis quas ante ipsum concilium habebat ad tollendum posteris omnem litigandi occasionem huic carte duximus inserendas Habebat igitur in leubatsdorf unam in gunuarn duas in kaltenberge octo in villa baden tres in monte baden novem in solitudine quinque in phafstetn undecim in sazze sex in haikogel unam in talar vineam grandem que bivnde appellatur et alias XVIIII in monte wartperc quinque in urteile duas in medlic novem in pruele duas in engelshalhestorf XIII in waltrichestorf unam et unam contulit Heinricus de Rotelensteine Ut igitur in hac carta expressa compositio cui capitulum monasterii utriusque consensit rata inconvulsaque permaneat presentem paginam communimus sigilli nostri impressione testiumque conscriptione quorum hec sunt nomina Sifridus orphanus monasteriensis prepositus Heinricus pataviensis canonicus et scriba noster Heinricus de Medlic Ulricus de Draskirchen Wernhardus de Sicendorf plebani Salomon capellanus noster Liupoldus notarius noster Magister Ditricus Magister Robertus Francigena Ulricus Struno marscalcus noster Rudolfus de Botendorf Wichardus de sancto Vito Liupoldus pincerna noster Cunradus de Wikendorf Hermannus phuscel Meinhardus de Draskirchen Eberhardus de Medlic decimatores Actum Wienne in domo Ditrici Anno dominice incarnationis MCCXVI III idus Novembris feliciter Amen