Charter Document - 03860142

Ich Lewepolt von Sachsengang vergich an disem brief und tun kund allen den die nu sint und hernach kuenftig werdent das mein vater dem got gnad her Lewepolt von Sachsengang het den zehent dacz Leuebmansdoerff von dem goczhaus dacz Goettwey mira wan ze seinem leib und ze seinen tegen Darnach da mein vater verschied von der welt da wolt ich haben gekrieget umb denselben zehent mit dem goczhaus ze Goetwey Da cham ze mir der erber man abbt Hainreich von Goettwey und ermaenet mich des daz der vorgenant zehent meines vater leibgeding was und das ich daran nichts rechts hett und ermaenet mich des mit meines vater hanntvest alsverr das ich pin gestanden genczleichen und mit guetem willen von all dem chrieg und von all dem recht das ich mocht gehaben an dem vorgenanten zehent dacz Leuebmansdorff und han daruber gegeben disen brief mit meinem insigil zu einem ewigen urkund Des sind zeug her Hermann von Sunnberkch her Wulfing von Gerlas her Marquart und her Ott von Wildenstain her Ulreich von Riczendarff und ander bider lewet Der brief ist geschriben ze Wienn an den suenwenttag da von Kristi gepuerd waren tawsent iar zway hundert iar in dem aechten und newenczikistem iar