Charter Document - 03860141

Charter Document - 03860141


Charter Number: 03860141
Cartulary Title: Göttweig Stiftsarchiv Urkunden 1058 - 1899 [1350]
Charter Language: German
Charter Origin: Lay
Charter Type(s): Confirmation
Date: 1298
Date type: Internal, A.D., Feast
Resource Link(s): Monasterium.net

Charter:

Ich Wulfing von dem Gerlos vergihe und tun chunt allen den di disen prief sehent oder hoerent lesen di nu lebent und hernach chunftich sint daz ich gesatz hette den erbaern apt und die samnunge von Chotweich und den erbaern probest Echarten und die samnunge von Sand Poelten mit sampt ir prieven an die juden von Sand Polten ir ieglichen fur zwai hundert phunt phenninge und fur zwai min vierzich phunt phenninge Wienner muentz dafur ich sie reht und redlich gelediget und geloeset han aller dinge und tun auch chunt daz ich sie nihtes zeihe dan lieb und gut und danck in vleizchlichen der triwen und aller triwen di si mir getan habent die ich immer umb sie dienen wil dieweil ich lebe mit leibe und mit gute und gib in daruber diesen prief ze ainem urchunde und ze ainem geziuge versigilten mit meinem insigil Und sint auch des geziug her Chalhoch von Eberstorf her Liupolt von Sachsengange her Chunrat von Praitenvelde her Hainrich sein pruder Praun von Himperch und ander bidirbe leute genuch Dieser prief ist geben ze Wienne an sand Michelsabunt do von Christes geburt waren ergangen tausent iar zwai hundert iar in dem achten und niunzigistem iare