Charter Document - 03860130

Ich Wernhart von Hippleinstorf und mein housfrow fro Sewurch veriehen und tun chunt allen den di nu sint und hernach chuenftich werdent daz wir dem erbaern abbte und der samnung ze Choetweig unsers rechten aigens an zehen siben Shilling guelt ouf dem lehen daze Zaizzenperig darauf dazselb gotshaus emaln het zehen und drei Shilling guelt haben verchouffet umb driuzehen pfunt pfenning und sein desselben gutes shon gewert und haben ouch in di vorgenanten guelt gegeben vreileich und an all vogtai und mit gutem willen meins pruder Hermans von Hippleinstorf mit soetam geluebd daz wir desselben gutes sullen ir sherm und ir gewer sein fuer all ansprach als des landes recht ist Daz aber di sache staet und unzebrochen ebichleich beleib haben wir dem vorgenantem gotshaus gegeben disen brief verinsigelten mit hern Livtolts insigel von Chvnring und mit dem meinn und meins vorgenanten pruder insigel Der sache sint ziug her Ott der Floit Fridreich Plum Vlreich Plum Chvnrat von Hvernpach Cholman und sein pruder Andre von Stein Engelshalch von Furt Chunrat und Vlreich doselben und ander piderb laeut Der brief ist geshriben ze Chotweig do von Christes geburt waren tousent iar zwai hundert iar an dem vir und niunzkistem iar an sand Tomas abent