Charter Document - 03860127

Ich Margret von Streitwesen und min sun Heinrich tun chunt allen den di disen brief ansehent die nu sint und hernach chuenftich werdent daz wir haben verchouffet dem erbern abt und der samnung ze Choetweig unsers rechten aigens aecht hofstet daze Goeznich darouf ligent an zwelf niun shilling guelt und hab auch gelobt dem vorgenantem abt und der samnung ze Choetweig daz wir ir gwer suellen sein und sullen in shermen daz selb aigen als aigens recht ist Daz aber di sach staet und unzebrochen beleib haben wir in gegeben disen brief verinsigelten mit unsern insigeln zeineme ebigen urchuend Diser sach sind ziug her Otacher von Lobenstein her Ott und sin pruder her Marquart di Haevsler von Wildenstein Wernhart Ditreich und Wuelfinch von dem Haevselin der Hilper von Stein Cholman und Andre doselben Chvnrat der Hvernpech Engelschalich von Fvrt Vlrich und Chvnrat doselben Heinlrich von Stein Walchun von Ekchendorf und ander piderb laeut Der brief ist gegeben ze Stein do von Christes gebuert waren tousent iar zwai hundert iar an dein vier und niunzkisten iar an sand Augusteinstag