Charter Document - 03860119

Ich Leutwein von Sunnenberch unt mein housvrowe Elspet veriehen an disem prief allen den die in anseheta und hor[e]nt lesen das wir meinem sweher hern Rugern dem Pranter unt meiner swiger vrowen Margareten meiner housvrowen vater unt mueter durch ir noetdurft haben verhenget hinzegeben ebechlichen daz guet ze Goznich mit allem dem rechte daz si daran heten abt Heinrichen unt der samenunge des gotshouses unser vrowen ze Choetwige umb fumve unt vierzich phunt phenninge wand daz selbe guet meinem sweher unt meiner swiger die vorgenant sint ze widerwechsel wart gegeben von herren Heinrich dem Lichtenstainer wider daz guet daz mein swiger meiner housvrowen mueter was anerstorben da ze Schonenstraze unt ze Rotenlaim unt verzeihen uns mit allen unsern chindelin gutem willen alles des rechtes daz wir dar[a]n heten unt des wir wartund sein gewesen erbrechtes unt vogtrechts unt daz da[ruber von uns nach] von unsern erben die wir heute haben oder vurbaz gewinnen dem vorgenantem [abbt und dem] gotshouse unser vrowen ze Choetwige unt der samenunge chain ansprach noch chain [irrun]ge vurbaz widervar des welle wir des abtes und der samenunge des gotshouses ze Choetwige gewer unt scherm sein unt geben in daruber ze stete unt ze urchunde disen prief mit unserm insigel unt mit der herren insingel die an disem prief hangent Des dinges sint gezeug her Pilgreim von Chapelle her Weichart der Heusler pharrer ze Neleub der Heinrich der pharrer von Sechsen her Leutold von Chunring des gotshouses vogt her Vlrich von Chapelle her Ott von Volchenstorf her Vlrich von Hovs her Eberhart der Harlunch her Wernhart von Russpach her Heinrich von Trovn her Vlrich von Smida Chunrat von Chapelle Wern[h]art Dietrich Wlfinch die Heusler Otte Marchwart von Wildestain Chunrat unt Leutwein von Hurnpach Alber und Leutwein von Hurnpach Chunrat und Vlrich von Fuert Cholman Andre Hil[per] unt ander piderwe leute Der prief ist gegeben da ze Sunnenberch da von Chri[sti gepu]rde waren tousent iar zwai hunder iar unt aines min niwenzich iar an sant [Mauriczen] tag