Charter Document - 03860056

In nomine sancte et individue trinitatis Wecilinus dei gracia Gotwicensis abbas et totum eiusdem loci capitulum omnibus Christi fidelibus in perpetuum Ut ea que aput homines geruntur in perpetuum memorie mandentur et conserventur nosse volumus tam presentes quam futuros lecturos hanc paginam quod nos de communi consensu dedimus magistro Heinrico clerico nostro de Naliub duo beneficia in Pomgarten cum suis pertinentiis pro XII talentis hoc pacto ut de eisdem beneficiis annuatim garrada vini ei solvatur que tamen garrada in usus fratrum est reddita ut totus conventus in quadragesima uno die cum piscibus competenter exhibeatur scilicet ut dominis duo fercula piscium dentur fratribus et dominabus unum et conventus solempnem vigiliam et missam defunctorum ob memoriam sui et parentum suorum cum signis sollempniter sonantibus debeat celebrare procuratis eodem die de cellario conventus VII pauperibus in pane et vino et uno ferculo datis etiam per manum prioris qui procurat consolationem piscibus et VII denariis eisdem pauperibus et eodem Heinrico sacerdote decedente sicut unius fratrum sacerdotum fit eius memoria Et ut hec promissio firmius in annos duret opus singularis pietatis addidit quod reditus ecclesie sue Naliub in usus fratrum per biennium contradidit exceptionibus istis interpositis quod utroque anno de eisdem reditibus Vlrico fratueli suo ad studium tres marche per diligentiam abbatis mittantur Et si infortunio aliquo idem Heinricus plebanus ultra mare quod deus avertat preoccupatus fuerit quicquid per litteras vel per certum nuncium sibi mittendum significaverit omni occasione postposita mittatur Et si de transmarinis partibus deo donante redierit prebendam fratris in quocumque habitu voluerit habeat Firmata est autem hec actio in conventu fratrum data dextera singulorum vice sacramenti ut pactum hoc nunquam ab aliquo abbate irritetur et si abbas irritare voluerit a toto capitulo unanimiter reclametur firmato hoc pacto tam abbatis quam conventus sigillo