Charter Document - 03860051
| Charter Number: | 03860051 |
|---|---|
| Cartulary Title: | Göttweig Stiftsarchiv Urkunden 1058 - 1899 [1350] |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1216 |
| Date type: | Assigned |
| Resource Link(s): |
Monasterium.net |
Charter:
In nomine sancte et individue trinitatis Livpoldus dei gratia dux Austrie et Stirie omnibus Christi fidelibus in perpetuum Eam principum decet esse considerationis industriam ut non solum lites decidant sed etiam fine debito decisas vel transactione terminatas perpetuam studeant habere firmitatem Inde est quod pro firmitatis robore universitati fidelium volumus constare quod Wezilinus abbas Kotwicensis causam contra Vlricum Trovmil movit pro eo quod debitam annuatim pensionem XXII solidorum de possessionibus Shibz et Lvogental quas sub nomine ecclesie Kotwicensis possidebat per plures annos violenter detinuit et nec debitum solvere nec possessiones ipsas dimittere voluit Que causa mediante Vlrico comite de Pernek sub huius transactionis forma est decisa videlicet quod interventu predicti comitis abbas debitum de preterito remisit Vlricus se data dextera vice sacramenti predictam pensionem in festo beati Cholomamn annuatim solvere obligavit et si non solveret predicta die proxima die post festum Cholomanni sine omni contradictione iurisdictionem perdidisset quam in predictis possessionibus habuit Ut ergo ista transactio etiam apud heredes Vlrici rata et inconvulsa habeatur utraque pars eam litteris nostris et sigilli nostri inpressione muniri postulavit Unde paginam presentem pro certitudine facti huius conscribi voluimus et sigilli nostri inpressione roboramus Testes autem qui huic transactioni intererant sunt hii Vlricus comes de Perneke Adeloldus de Chiv Wolfkerus de Chraewils Hanricus filius Erchinberti de Stiven Sifridus de Grifenstein