Charter Document - 03860045

In nomine domini nostri Iesu Christi W[ernherus] de Sancta Cruce et R[icherus] in Zwetel abbates et S[igahardus] Sancti Ypoliti et O[tto] Sancti Floriani prepositi et C[hunradus] plebanus in Ruspach fide presentis scripti tam presentium quam futurorum memorie commendamus et protestamur quod cum causa que inter abbatem et ecclesiam Medlicensem et abbatem et conventum Kotwicensem super predio in Myrs vertebatur nobis Sancti Ypoliti et Sancti Floriani prepositis et C[hunrado] plebano in Ruspach a sede apostolica delegata fuisset convenientibus nobis et partibus et consilio illustris ducis Austrie Styrie que Liypoldi ut finis inponeretur controversie in nos arbitros ab utraque parte abbatum utriusque conventus libero assensu accedente fuit compromissum utraque parte per cautionem fideiussoriam se alteri ad penam centum marcarum obligante si compromissione in irritum deducta nostro non starent arbitrio Nos igitur inquisitis diligentius utriusque cause viribus et discussis utriusque partis meritis et allegationibus cum contra titulum donationis quem ex privilegio Heinrici imperatoris abbas Medlicensis de eodem predio pretendebat abbatem Kotwicensem defenderet longeva possessio et centum annorum prescriptio et preterea titulus donationis ab Heinrico burchgravio et postmodum ab Ottone fratre suo facte cum additione ville Chotzendorf tandem de prudentum virorum consilio super premissis tale pronuntiavimus arbitrium sub pena pretaxate pecunie firmiter statuentes observari primum ut sibi ad invicem rancorem dimitterent qui ex eadem causa videbatur inter eos ortus fuisse et possessio pro qua vertebatur controversia ecclesie Kotewicensi in iure remaneret perpetue proprietatis et abbas Medlicensis suo et fratrum suorum nomine tam eidem possessioni quam privilegio prememorati Heinrici imperatoris publice in manus nostras renuntiaret sub pena pretaxata precipientes ut nulla amplius inde questio ex parte Medlicensis abbatis moveretur et abbas Kotwicensis et ecclesia sua ecclesie Medlicensi XXX talenta persolveret et reditus unius talenti in censu annuo pro eisdem talentis obligaret ita tamen ut utilitas de predio obligato proveniens singulis annis in summam predicti debiti computaretur donec idem debitum esset totaliter persolutum Preterea arbitrati sumus ut hoc ipsum arbitrium scripto commendatum ad peticionem abbatis Medlicensis suique conventus sigillis domini Pataviensis episcopi et domini ducis confirmaretur Sub predicta itaque forma pronuntiatum arbitrium omni remoto contradictionis obstaculo pars utraque recepit et eadem die Medlicensis abbas ad abbatem Kotwicensem accedens cum assensu fratrum qui secum aderant ex parte tocius conventus in nostra presentia predicto debito XXX talentorum et obligationi que pro eisdem facta fuerat voluntate propria renuntiavit Acta sunt hec Crhemis anno incarnationis domini millesimo ducentesimo septimo indictione decima pontificatus Innocencii pape anno decimo regnante rege Phylippo presidente Manegoldo Pataviensis ecclesie episcopo presentibus istis Tutone in Heimpurch Arnoldo in Sancta Petronella Pilgrimo in Albrehtesperge Heinrico in Witen Sifrido in Mvtharn Heinrico in Chovlivbe plebanis Gotefrido Engilberto Chunrado laicis et aliis quam pluribus