Charter Document - 03860044

In nomine domini W[ernherus] in Sancta Cruce et R[icherus] in Zwetel abbates et S[igahardus] Sancti Ypoliti et O[tto] Sancti Floriani prepositi et C[hunradus] plebanus in Rvspach fide presentis scripti tam presentium quam futurorum memorie protestamur qualiter cum causa que inter abbatem et ecclesiam Medlicensem et abbatem et conventum Chotewicensem super predio in Myrs vertebatur nobis Sancti Ypoliti et Sancti Floriani prepositis et C[hunrado] plebano in Rvspach a sede apostolica delegata fuisset convenientibus nobis et partibus de consilio illustris ducis Austrie Livpoldi ut finis imponeretur controversie in nos arbitros ab utraque parte abbatum utriusque conventus libero assensu accedente fuit compromissum utraque parte per caucionem fideiussoriam se alteri ad penam centum marcarum obligante si compromissione in irritum deducta nostro non starent arbitrio Nos igitur inquisitis diligentius utriusque cause viribus et discussis utriusque partis meritis et allegationibus cum contra titulum donationis quem ex privilegio Heinrici imperatoris abbas Medlicensis de eodem predio pretendebat abbatem Chotewicensem defenderet longeva possessio et preterea titulus donationis sub Heinrico burggrafio et postmodum ab Ottone fratre suo facte cum addicione ville in Chotzendorf a nos tandem de prudentum virorum consilio super premissis tale pronuntiavimus arbitrium sub pena pretaxate pecunie firmiter statuentes observari primum ut inter ipsos fraterna dilectio et caritas sincera maneat et inconcussa et possessio pro qua vertebatur controversia ecclesie Chotewicensi in iure remaneret proprietatis perpetue abbate Medlicense suo et fratrum suorum nomine tam eidem possessioni quam privilegio prememorati Heinrici imperatoris publice in manus nostras renunciante quantum ad omnem articulum per quem ecclesie Chotewicensi perpetuo videretur nasci posse preiudicium Pronunciavimus etiam ut vice versa abbas Chotewicensis et ecclesia sua ecclesie Medlicensi in XXX talentis essent debitores obligando pro eisdem de predictis ecclesie sue ad redditus unius talenti in censu annuo sic ut utilitas de predio obligato proveniens singulis annis in summam predicti debiti contaxaretur quamdiu ecclesia Chotewicensis in parte debiti residua non esset solvendo Preterea arbitrati sumus ut hec ipsa nostri arbitrii scripta pronunciacio sub sigillo domini Pataviensis episcopi et domini ducis Austrie roborari deberet abbate Medlicense suoque conventu petente Acta sunt hec Chremis anno incarnationis domini MCCVII indictione decima pontificatus Innocentii pape anno decimo regnante rege Phylippo presidente Manegoldo Pataviensis ecclesie episcopo presentibus istis Tutone in Heymburch e Arnoldo in Sancta Petronella Pylgerimo in Albrehtesberge Heinrico in Witen Syfrydo in Mvvtharn Heinrico in Chvlivbe plebanis Gotefrido Engelberto Cum laicis et aliis quam pluribus