Charter Document - 03860038

In nomine sancte et individue trinitatis Dipoldus dei gratia Pataviensis episcopus omnibus Cristi fidelibus tam futuris quam presentibus in domino salutem Pastoralis officii sollicitudo expostulare videtur ut monasteria divinis mancipata obsequiis paterna debeamus liberalitate intueri et eorum commodis et utilitatibus qui in eis domino die ac nostea deserviunt quique pro nostra nec non successorum nostrorum incolomitate ad deum patrem luminum preces fundunt assiduas propensius invigilare Ea propter sancte dei genitricis Marie ad pedes usque humiliter inclinati predecessoris nostri pie recordationis Altmanni Pataviensis episcopi apostolice sedis legati vestigiis pro modulo nostro inherentes attendentes etiam fidelitatem et devotionem quam dilectus filius noster Rodmarus abbas et fratres de Chtewico erga sanctum Stephanum prothomartirem in Patavia et nos nostrosque successores canonice substituendos habere dinoscuntur pensata nichilominus uberi et devota elemosinarum largitione qua pretaxati fratres in anniversario prefati episcopi Altmanni in presentia nostra copiosam multitudinem pauperum respexerunt terciam partem decimarum in parrochia de Pircha que post donationem duarum partium a domno Altmanno in prima fundatione Chotewicensis monasterii factam indigentie plebesani sacerdotis deputata fuit ad usus et refectionem pauperum in hospitali prescripti monasterii concurrentium pro remedio anime nostre nec non parentum nostrorum cum consensu chori nostri et ministerialium coniventia tradidimus hac interposita condicione ut postquam diem clauserimus extremum in anniversario nostro recordatio nostri quantulacumque inibi habeatur Sane quia petitio et ius representacionis in prenominata ecclesia ad abbatem et conventum libere et sine ambiguitate spectabat hanc prerogativam Rovdmaro abbati viro utique discreto et relligioso et nobis plurimum accepto eiusque successoribus per ostium intrantibus indulsimus quod ad arbitrium et voluntatem ipsorum sacerdos discretus et honeste opinionis clericus dumtaxat in ea ordinetur qui contentus stipendio quod ei abbas qui tunc pro tempore exstiterit ordinare competenter voluerit divina ibidem celebret populo et ecclesiastica sacrementa ministret Ceterum alia que de decimis et oblationibus aliisque utilitatibus provenire et superesse poterunt per manum abbatis ad supplementum pretaxati hospitalis annuatim sub aliqua certa pensione ministrentur Verum quia mentionem de iure peticionis in Pircha fecimus ne hanc nostram ordinationis constitutionem in reciduum scrupulum quempiam reducere contingat precipimus auctoritate qua licet indigni et impares viribus preminemus et statuimus ne quispiam de cetero pro aliqua persona aput successores nostros peticionem sicut fieri assolet porrigere presumat vel etiam attemptet Indecens enim valde esset ut quod studio pietatis admissum fuisse dinoscitur si in detrimentum monasterii postea quomodo libet verteretur Itaque institutio iam dicte ecclesie secundum nostram constitutionem omnifariam ad Chotewicensis abbatis ordinationem inconvulse et quiete permaneat et observetur Si quis autem attemptaverit hanc nostram traditionem et scripti nostri caracterem adnullare et in irritum reducere cum Dathan et Abiron iram et divini animadversionem iudicii se promeruisse sentiat atque cum impiis et scelertis reputatus communione corporis et sanguinis Christi in novissimis careat Cunctis autem hec servantibus et hoc ipsum quod in memoriam nostri fecimus benigno oculo respicientibus sit pax et exultatio et in munero iustorum consortium invenire mereatur per eum qui erat et qui est et qui venturus est reddere unicuique iuxta opera sua amen amen amen Acta sunt hec anno incarnationis dominice millesimo CLXXXIIII indictione I sub domno Lucio papa III regnante Friderico Romanorum imperatore augusto anno vero pontificatus domini Diepoldi XI + Ego Diepoldus Pataviensis ecclesie episcopus + Ego Otto maioris ecclesie prepositus + Ego Fridericus Pataviensis decanus + Ego Ditmarus eiusdem ecclesie thesaurarius + Ego Meinhalmus presbiter canonicus Pataviensis + Ego Hainricus presbiter canonicus Pataviensis + Ego Fridericus archidiaconus Pataviensis + Ego Olricus prepositus Ardeacensis + Ego Purchardus de Chambe canonicus Pataviensis + Ego Wernherus archidiaconus Pataviensis et canonicus + Ego Wolfkerus prepositus Cellensis et Monasteriensis + Data in palacio Szaizcenmovre per manum Tagenonis notarii et capellani III kalendas decembris