Charter Document - 03850072

Ich Friderich der Vuchs von Stetelndorf vnd ich Dyemut sein housvrowe wier tun chund allen den die nu lembtich sint vnd hernach chumftich sint di den gegenburtigen prief ansehent oder lesent daz wier mit vnser chinde gunst vnd aller vnser gerben gutem willen haben verchouffet an lehen ze Gauderndorf daz von choufreht vns aigenleich an gebort dem gotshous hintz Altenburch mit alle dem reht als wier iz heten en gver vnd en gvalt vmb dreutzehen phunt vnd loben an disem prief daz wier desselben lehens daz vor bnant ist gwer vnd ovch sherm sein wellen als lants vnd aigens reht ist einz vnd dreizzich iar vnd ain tach vnd wellen ez ovch verantwuortten svo sin durft geshiht vnd haben des vnser trew gegeben dem abte vnd seiner sampnunge von Altenburch Vnd daz vuerbaz daz gantz vnd steat sei vnd immer vnzbrochen des geb wier vber disen chouf den gegebuortigen prief ze rehter vrchunde dem vorbnanten gotshous ze Altenburch wand wier selbe aigens insigels niht enheten verinsigelt mit der edeln herren insigel hern Hougeins vnd hern Reimprehts der zwair Tuorsen von Lyhtenvels di da pei gvesen sint vnd der red gezevg sint mit andern vrumen levtten di da pei warn vnd sin mit sampt in gezevg sint Daz sint die gezevg Perhtolt der Sam von Stetelndorf Hartlieb der Oehsel vnd Gotfrit vnd sein pruder Jacob von Ekchendorf Vlreich der Hedreinstorfer vnd sein sun Vlreich Hainreich der Svtzze Vlreich von Ebental Ruedinch von Essenprukke Hainreich von Wiltperch Engelpreht von Chrug Gotshalich von Vronhoven Hainreich der Dahpech Vlreich sein pruder Engelpreht der Stainpekche Alber vnd Leutwein sein pruder von Vuenvelde Leutwein von Wolfpaizzinge Alber der Waltkerstainer Wulfinch von Harrazze Vlreich der Star Marquart der Jeger von Wuldeinstorf der ouch sherm vnd gver des selben lehens mit sampt vns ist vnd daz ouch globt hot er vnd sein housvrowe var Elspet mit sampt ier chinden vnt habent des ier trew gegeben vns vnd ouch den vorbnanten herren von Altenburch daz si mit sampt vns ez verantwurtten vor allem reht Dar zue ander vrume leutte gnueg di sin ouch zevg sint Daz ist geshehen vnd ist der prief gegeben nach Christes gepuerd vber tousent iar zvai hundert iar in dem fumf vnd nevncigistem iar datz Ekchendorf ze der Mitvasten an dem Suentag