Charter Document - 03850030
| Charter Number: | 03850030 |
|---|---|
| Cartulary Title: | Altenburg Stiftsarchiv Urkunden 1144 - 1943 [1350] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1284 |
| Date type: | Internal, A.D., Papal |
| Resource Link(s): |
Monasterium.net |
Charter:
Vniuersis Christi fidelibus ad quos presentes littere peruenerint nos dei gratia Petrus Arborensis archiepiscopus Vincentius Portugalensis Bartholomeus Gaietanus Acerus Wexionensis Bernardus Humanas Tholomeus Sardanensis Henricus Saxenatis Geuehardus Brandeburgensis Torfinnus Hammarensis et Andreas Aslvensis episcopi salutem in domino sempiternam Licet is de cuius munere venit vt sibi a suis fidelibus digne ac laudabiliter seruiatur de abundantia pietatis sue merita supplicum excedens et uota bene seruientibus tamen multo maiora tribuat quam valeant promereri desiderantes itaque reddere domino populum acceptabilem fideles Christi ad complacendum ei quasi quibusdam allectiuis muneribus indulgencijs videlicet et remissionibus inuitamus vt exinde reddantur diuine gratie aptiores Cupientes igitur vt monasterium in Altenburch ordinis sancti Benedicti Patauiensis dyocesis congruis honoribus frequentetur omnibus vere penitentibus et confessis qui ad ipsum monasterium in festis subscriptis videlicet in singulis festiuitatibus domini scilicet Natiuitatis Resurrectionis Ascensionis et Pentecostes in singulis festiuitatibus beate Marie virginis in festo sancti Michaelis archangeli in festo sancti Johannis baptiste in festis sanctorum apostolorum Petri Pauli Jacobi Johannis atque Andree in festo beati Lamberti in festo sancti Benedicti in festis sanctorum Martini et Nicolai confessorum in festo beate Katerine virginis in festo omnium sanctorum ac in dedicatione ipsius monasterij causa deuotionis accesserint vel ad structuram aut ad aliqua necessaria predicti monasterij manus adiutrices porrexerint nos de omnipotentis dei misericordia et beatorum Petri et Pauli apostolorum auctoritate confisi quilibet nostrum quadraginta dies de injuncta sibi penitentia dummodo consensus dyocesani accesserit misericorditer in domino relaxamus In cuius rei testimonium presentes litteras sigillorum nostrorum munimine duximus roborandas Datum apud Vrbem ueterem anno domini millesimo ducentesimo octuagesimo quarto VII Idus Marcij pontificatus domini Martini pape quarti anno tercio