Charter Document - 03850002

Ego Regenbertus dei gratia Patauiensis episcopus cunctis ecclesie nostre fidelibus in perpetvum saluter a domino Quecunque siue a principibus siue a quibuscunque Christi fidelibus ob salutem animarum et honorem fiunt ecclesiarum eorum quam maxime longa scripto et testibus facienda est memoria ut pariter religiose instituta iugiter inviolata permaneant et posteri pie deuotionis exemplo prouocati etiam ipsi suis quique temporibus pari studio sue suorumque saluti prouideant Itaque domina Hildebvrch undique a progenitoribus suis nobilissima defuncto uiro suo felicis memorie comite Gebehardo de Bouige cellam quandam in monastica conuersatione sub beati Benedicti regula ad titulum beati protomartiris Stephani in loco fundi sui qui dicitur Altenburch una cum filio suo domino uidelicet Hermanno deo cooperante fundavit ibique ob intercessionem anime sue et predicti comitis mariti eius Gebehardi necnon et filii sui una cum ipsa fundatoris eiusdem cenobii denique pro cunctis fidelibus defunctis deo et sanctis suis perpetuum ordinavit obsequium Cuius etiam deo prompta liberalitas bona infra subnotata in sustentacionem monachorum domino illic deseruientivm eidem ecclesie contulit eamque collationem nullis reclamantibus testibus et nostro scripto pariter et sigillo rata undique contestacione roborauit Quas siquidem decimarum porciones quas iure et consuetudine antiquata semper optinuit in barrochia que Ornha dicitur et Sanhecou et Toutendorf et Foukela et Stranzendorf cum omnibus suis pertinentiis prefata matrona cenobio sicut diximus a se constructo donavit Et ut hec instituta contra defectionem contra quorumlibet vsurpationes et occasionem firmitatem suam optineant nouerint quicunque actionem istam irritauerint vel bona huic ecclesie collata distraxerint anathematis uinculo auctoritate dei omnipotentis et nostra sese subiacere perpetuo Quod si forte post nos aliquis episcopus aggressus fuerit vel mutare vel prorsus euacuare monachicam illius fundationis vitam nummum quidem aureum quicunque illius domine per consanguinitatem proximus exstiterit episcopo successori nostro persoluat et quicquid a predecessoribus suis cenobio collatum fuit quousque reformetur eorundem monachorum institutio recipiat Nos quoque ex parte nostra illic baptizari mortuos quicunque uoluerint sepeliri permittimus et qui locum tueatur predicte cognationis maior natu semper succedat aduocatus et quod preter eundum non est fratres illius loci liberam optinentes electionem cum opus fuerit abbatem sibi cum dei uoluntate et nostra auctoritate unanimo et salutari consilio eligant et electum a quo ordinetur ad episcopum suum perducant Testes subtitulatos tractis auribus predictis actionibus adhibuimus comes Hermannus prefate domine filius comes Adalbertus de Rebegou Diethricus de Rouzmares Chounradus de Rietenburch Waltherus de Traiesem Chounradus de Chrouge Almar de Franchenrouthe Pernoldus de S Ypolito Roudpertus de Rossespach Rapoto de Sizenisdorf Lanthfrid de Burgerewisen Actum est hoc post incarnationem domini anno millesimo CXLIIII Sub imperio regis Chounradi Data VII Kal Avgusti apud Chremesam