Charter Document - 03840009

Nos Wernhardus Dei gratia ecclesie Pataviensis episcopus notum facimus universis presentes literas inspecturis quod attendentes multam devotionem fratrum Sancti Augustini in Padmen qui divino cultui decenter insunt et frequenter propter quod ipsos et ipsorum monasterium debemus merito favore prosequi speciali donationem iuris patronatus capelle in Padmen nostre dioecesis factam fratribus Sancti Augustini in Padmen et monasterio ipsorum per nobilem virum Hainricum de Potendorff et Chunegundim uxorem suam et omnes heredes eorum pleno accedente capituli nostri consensu et de certa scientia in his scriptis et authoritate ordinaria in nomine Domini confirmamus quin immo prefatam capellam in Padmen monasterio fratrum Sancti Augustini in Padmen donamus et annectimus perpetuo sub hoc modo quod cedente vel decedente presenti rectore capelle nominate ipsa capella prehabita ad monasterium fratrum predictorum cum omnibus iuribus redditibus et obventionibus debet perpetualiter pertinere Et ne ex confirmatione seu donatione huiusmodi iurisdictio nostra ordinaria minuatur promiserunt fratres predicti bona fide quod ratione capelle in Padmen onera Sedis Apostolice et legatorum eius ac etiam iura episcopalia ceteraque canonice incumbentia congrue velint et humiliter supportare Ut autem premissa robur obtineant perpetue firmitatis presentes dedimus literas nostro et capituli nostri sigillorum munimine roboratas Date apud Patavium anno Domini MCC nonagesimo septimo in die beati Sixti pape et martyris