Charter Document - 03840008

Ich Hainrich von Potendorff unnd ich Chunegund sein haußfrawe wir veriahen und thuen kundt allen den die diesen brief sehend lesena oder horend lesen die nu lebend unnd hernach kunfftig sind daß wir mit unnser erben guetem willen unnd gunst unnd mit zeitigem rath annder unnserer freunde unnd mit gesambter hand verkhaufft haben alle unnser aigenschafft unnd alles unnser aigen das wir haben gehabt da zu Paden zu holz ze velde unnd ze dorff gestifft oder ungestifft versuecht oder unversuecht wie es genannt ist umb zwayhundert pfundt Wiener pfenning der wir recht unnd redlich gewehrt sein dem erbaren manne brueder Sighardte dem prior unnd der samnungen gemaine sant Augusteins ordens des hauses da zu Paden lediglichen unnd freylichen ze haben unnd allen iren fromen damit ze schaffen verkhauffen versezen unnd geben wem sie wollen ohne allen irresal Daruber so haben wir ich vorgenannter Hainrich und ich Chunegund sein haußfrawe die capellen die da leit auf dem vorgenanntem aigen das wir da ze Paden verkhaufft haben geben nach geistlichem rechte lauterlichen durch Gott unnd durch unnser vordern seele und durch unnser seele willen auf das gottshauß der vorgenannten brueder sant Augusteins ordens da zu Paden Daruber so sezen wir unns ich vorgenannter Hainrich von Potendorff unnd ich Hainrich unnd ich Rudolff seine sohne unverschaiden dem vorgenannten gottshauß unnd den brudern sannt Augusteins ordens da zu Paden umb das vorgenannt aigen da ze Paden zu rechtem scherm fur alle ansprach nach landtsrechte unnd geben ihn daruber diesen brief zue ainem urkhunde unnd zu ainem gezeuge unnd zu ainer ewigen vestunge dieser sachen versiegleten mit unnserm insigel unnd mit der erbaren herrn insigiln die ihr insigil zue ainem gezeuge an diesen brief gehangen haben und sind auch gezeugen herr Leutholt von Chunring schenckh in Osterreich herr Stephan von Meißawe marschalckh in Osterreich herr Alber von Puechaim truchsaße in Osterreich herr Albrecht der Stuchs von Trautmansdorff unnd herr Ulrich von Wolffgerstorff die zu den zeiten landrichter waren in Osterreich herr Chunrad unnd herr Seybott meine brueder von Potendorff herr Lupoldt von Sachsengange unnd sein sohn herr Lupoldt herr Chalhoch von Eberstorff herr Dietherich von Wolffgerstorff herr Leutoldt von Chrebspach unnd seine sohne Hainrich Friderich Engeldiech unnd Leutold herr Albrecht von Aleet herr Haertwich von Ort herr Ulrich der Schenche unnd sein prueder herr Marchart von Riedt Chunrad unnd Nicla die prueder von Valwa herr Otte von Paden herr Wolffger von Ror Wulfinch der Rinderschinch Haidenrich von Feichenstorf unnd anndere bidirbe leuth genueg den diese sach wol kundt ist Dieser brief ist geben in der Minner Bruder Hauß zu Wienne des nahisten pfinztages nach den feirtagen in den ostern do von Christus geburth waren ergangen tausent jahr zwayhundert jahr in dem sibenden unnd neunzigisten jahre